ყველაფერი ეს ექვსი წლის წინ ხდებოდა. გავიხსენოთ, თუ როგორ დაეხმარა "თეთრ-წითლებს" ერთა ლიგის შემოღება, როგორ შეუწყო ამ ტურნირმა ხელი ჩვენს ქვეყანაში ფეხბურთის განვითარებასა და როგორ მივედით D ლიგის რიგითი პატარა ეროვნული გუნდიდან - კონტიტენტის პირველობის მთავარ აღმოჩენამდე.
ერთა ლიგა და საქართველოს ნაკრები
ერთა ლიგის არსებობამდე, მსოფლიოსა და ევროპის ჩემპიონატზე მოხვედრის გზა იყო საკვალიფიკაციო ეტაპის წარმატებით გავლა ან ტურნირის მასპინძლის სტატუსის მოპოვება. პატარა გუნდები ხშირ შემთხვევაში იჩაგრებოდნენ, რადგან ისინი ვერ ახერხებდნენ ჯგუფურ ეტაპზე მათზე ძლიერი ნაკრებებისთვის სათანადო კონკურენციის გაწევა.
მაგალითისთვის გავიხსენოთ 2008 წლის ევროპის ჩემპიონატის საკვალიფკაციო ეტაპი, რომელშიც საქართველოს მოწინააღმდეგეები ჯგუფში იყვნენ იმ დროს ახლახანს დასრულებული მუნდიალის ფინალისტები: იტალიისა და საფრანგეთის ეროვნული გუნდები. ჯგუფში ასევე იყო უკრაინა, რომელიც საუკეთესო პერიოდს განიცდიდა.
ერთი სიტყვით, ჯგუფის აუტსაიდერს ტურნირზე მოხვედრისთვის სჭირდებოდა დიდი სენსაციის მოხდენა, თანაც არაერთხელ. ერთა ლიგა გამოდგა ერთგვარ ალტერნატივად: ეროვნული გუნდების ლიგებად დაყოფა, მხოლოდ შენი გუნდის დონის მეტოქეებთან თამაში, პლეიოფი და ფინალი, რომელიც დიდ ტურნირამდე გზას პირდაპირ ხსნის.
"ჯვაროსნები" ერთა ლიგის პირველ გათამაშებაში განწესებულები იყვნენ მეოთხე და ყველაზე სუსტ, D ლიგაში. ჯგუფში მოწინააღმდეგეები იყვნენ ზემოთხსენებული ყაზახეთი, ლატვია და ანდორა. ლიგის გამოკვეთილ ფავორიტებად კი მოიაზრებოდნენ ჩრდილოეთ მაკედონია, სომხეთი, კოსოვო და ბელარუსი.
ჩვენმა ნაკრებმა უმარტივესად გადალახა ჯგუფური ეტაპი და შესაძლო 18 ქულიდან 16 მოიპოვა. D ლიგაში ასეთი შედეგიანი სხვა არ ყოფილა. ოთხი ჯგუფიდან ოთხმა საუკეთესო ეროვნულმა გუნდმა გადაინაცვლა ევრო 2020-ის შესარჩევის პლეიოფში, სადაც "თეთრ-წითლების" მეტოქე იყო ბელარუსი, მათ შორის მოგებული კი ჩრდილოეთ მაკედონია - კოსოვოს შორის საუკეთესოს ხვდებოდა.
სლავების დამარცხების შემდეგ, ვლადიმირ ვაისის გუნდს ფინალში ელოდა ჩრდილოეთ მაკედონია, შეხვედრა თბილისში იმართებოდა. რა მოხდა იმ თამაშში და უშუალოდ მატჩის დაწყებამდე, კარგად გვახსოვს და იმ უსიამოვნო მომენტის გახსენების საჭიროება არ არის. საქართველომ წააგო, ევრო 2020-ზე კი ბალკანელები გავიდნენ.
ერთა ლიგის შემდეგ გათამაშებაში "ჯვაროსნებმა" როგორც თავიანთი ჯგუფის გამარჯვებულებმა ასპარეზობა დაიწყეს ერთი დივიზიონით მაღლა - C ლიგაში. ჩვენი ეროვნული გუნდის მეტოქეები იყვნენ ისევ ჩრდილოეთ მაკედონია, სომხეთი და ესტონეთი. მსვლელობა გამოდგა წარუმატებელი: მე-3 პოზიცია ჯგუფში.
ერთა ლიგის მესამე გათამაშება კი "თეთრ-წითლებისთვის" გამოდგა ტრიუმფალური, ზღაპრული და ეპოქალური - უმარტივესად გადალახული ჯგუფური ეტაპის შემდეგ, რომელშიც ვილი სანიოლის გუნდის ერთ-ერთი მეტოქე ჩრდილოეთ მაკედონია ისევ იყო, პლეი-ოფში დამარცხებული იქნა ლუქსემბურგი და საბერძნეთი. რა მოხდა შემდეგ? ეს უკვე ისტორიაა.
გიორგი ჩაკვეტაძე - ერთა ლიგის პირველი სეზონის სიმბოლო
როგორც აღვნიშნეთ, ერთა ლიგის ისტორიაში პირველი გოლი გაიტანა ჩაკვეტაძემ, რომელმაც იმ გათამაშებაში საერთო ჯამში ოთხი ბურთი გაიტანა. ქართველმა გამთამაშებელმა აალაპარაკა მთელი საფეხბურთო სამყარო და ევროპის ტოპ ტალანტების სიებშიც გაერია. იმ დროისთვის ის უკვე იყო გენტის მოთამაშე, მაგრამ 6 წლის წინ, ისე ჩანდა, თითქოს ტოპ კლუბში გადასვლა დროის ამბავი იყო.
გიორგის კარიერაში მოგვიანებით დაიწყო ტრავმების ეპიდემია - 2019 წლის თებერვლიდან 2021 წლის ივლისის შუალედში საერთო ჯამში მან გამოტოვა 98 მატჩი, რაც 554 დღე არის. საქართველოს ეროვნული გუნდის გამთამაშებელი ფორმის აღდგენას ცდილობდა ჰამბურგსა და ბრატისლავას სლოვანში, მაგრამ უშედეგოს.
ტრავმატული პერიოდის დასრულების შემდეგ, 25 წლის შემტევმა ნახევარმცველმა საკუთარი თავი იპოვა უოტფორდში - გუნდში, რომლის წამყვან მოთამაშედ ის დროთა განმავლობაში ჩამოყალიბდა. გასულ ზაფხულს "ჯვაროსნების" 10-იანმა ითამაშა ევრო 2024-ზე, ახლა კი ის "ყვითლებთან" პრემიერ ლიგაში აღზევებისთვის იბრძვის.
Exactly one year ago our Number 7, Giorgi Chakvetadze, scored the first goal ever of the UEFA Nations League 😍 @GeorgianFF. #throwback #kaagent pic.twitter.com/RGF75bmait
— KAA Gent (@KAAGent) June 6, 2019
ერთა ლიგის ახალი სეზონი
დღეს, სტარტს იღებს ერთა ლიგის ახალი სეზონი და თავის შეხვედრას ჩვენი ნაკრებიც ატარებს. მოწინააღმდეგე ჩეხეთის ეროვნული გუნდი იქნება. სანიოლის შეგირდები აღზევებულები B ლიგაში, აქ ნათლად ჩანს, თუ რამხელა პროგრესი გამოვიარეთ ყაზახეთთან მოგებიდან დღევანდელ დღემდე. იმედი დავიტოვოთ, რომ ყველაფერი ეს ჯერ კიდევ დასაწყისია.
