საფრანგეთი - იუგოსლავია 4:5 (ევრო 1960)
პირველი ევროპის ჩემპიონატი, პირველი გოლები და პირველი დაუვიწყარი შეხვედრა ტურნირის ისტორიაში. თამაშის მიმდინარეობისას, იუგოსლავია აგებდა 1:3-სა და 2:4-ს, მაგრამ 75-79 წუთების შუალედში სასწაული მოხდა, მომავალმა ფინალისტებმა საფრანგეთს 3 ბურთი გაუტანეს. შედეგად, 9-გოლიან თრილერში ბალკანელებმა იმარჯვეს.
იტალია - სსრკ 0:0, იტალიამ მონეტის აგდებით მოიგო (ევრო 1968)
გახსნითი შეხვედრა, რომელშიც მაყურებელმა ერთი გოლიც ვერ იხილა. ნაკრებები 120 წუთის განმავლობაში ცდილობდნენ კარის აღებას, თუმცა უშედეგოდ. ერთი შეხედვით, თითქოს არაფერია დასამახსოვრებელი, მაგრამ მატჩის ბოლოს ყველაფერი გადაწყვიტა უცნაურმა ფაქტმა, მონეტის აგდებამ. იმ დროს ჯერ კიდევ არ არსებობდა 11-მეტრიანების სერია და ფრეს შემთხვევაში სწორედ ამ ხერხს მიმართავდნენ. როგორც ვხედავთ, იტალიას გაუმართლა.
პორტუგალია - საბერძნეთი 1:2 (ევრო 2004)
ევროპის ჩემპიონატი, რომელიც დაიწყო პორტუგალია - საბერძნეთის დაპირისპირებით და იმავე წყვილის მიერ ნათამაშები ფინალური შეხვედრითაც დასრულდა. ისევე როგორც ფინალში, მოგებულები ელადელები გამოვიდნენ. ითვლებოდა, რომ ევრო 2004 იწყებოდა სენსაციურად, მაგრამ მთავარი სასწაული ჯერ კიდევ წინ იყო.
საფრანგეთი-რუმინეთი 2:1 (ევრო 2016)
საფრანგეთი ითვლებოდა შინაური ევროპის ჩემპიონატის მთავარ ფავორიტად და გახსნით შეხვედრაშიც გულშემატკივრები მასპინძლების მარტივ გამარჯვებას ვარაუდობდნენ. "მამლებმა" მოიგეს, თუმცა ეს მარტივი მოგება არ ყოფილა. 89-ე წუთამდე ანგარიში 1:1 იყო, თუმცა მატჩის მიწურულს დიმიტრი პაიემ "ლურჯებს" 3 ქულა მაინც მოუტანა.
იტალია - თურქეთი 3:0 (ევრო 2020)
ტურნირი, რომელიც იტალიის ტრიუმფით დასრულდა. 2020 წლის ევროპის ჩემპიონატს ჰყავდა სხვა ფავორიტები და მომავალ ჩემპიონებს გახსნით შეხვედრაშიც კი კრახს უწინასწარმეტყველებდნენ. პროგნოზი არ ახდა, "სკუადრა აძურამ" ერთი ამოსუნთქვით გაანადგურა მეტოქე და ჩემპიონობისკენ მიმავალ გზაზე დადგა.
