კარიმ ბენზემა
წლები რეალში: 2009-2023
შედეგი: 648 მატჩი, 354 გოლი
გამორჩეული ტიტულები: 5-ჯერ ჩემპიონთა ლიგა, 4-ჯერ ლა ლიგა, ოქროს ბურთი.
კარიმ ბენზემა შედეგების მხრივ ყველაზე მნიშვნელოვანი ფრანგი ფეხბურთელია რეალის ისტორიაში. გასულ დეკადაში ალბათ ვერავინ წარმოიდგენდა, რომ ბენზემა რეალში კრიშტიანუ რონალდუზე ბევრად უფრო დიდხანს დარჩებოდა. კარიმმა ამ კლუბს მიუძღვნა თავისი კარიერის 14 წელი, ცალკსახად, ის აბსოლუტური ლეგენდაა.
რაიმონდ კოპა
წლები რეალში: 1956-1959
შედეგი: 101 მატჩი, 30 გოლი
გამორჩეული ტიტულები: 3-ჯერ ჩემპიონთა თასი, 2-ჯერ ლა ლიგა.
ჩემპიონთა თასის ისტორია იწყება რეალის დომინაციით, სადაც ალფრედო დი სტეფანოსა და პაკო ხენტოსთან ერთად, კოპაც ბრწყინავდა. თავისი თაობის ერთ-ერთი საუკეთესო ფორვარდი, რომელიც მადრიდული კლუბის ისტორიის უმნიშვნელოვანესი ნაწილია. რაიმონდი გადმოვიდა რეიმსიდან, რომელსაც "სამეფო კლუბმა" ჩემპიონთა თასის პირველ ფინალში მოუგო.
კლოდ მაკელელე
წლები რეალში: 2000-2003
შედეგი: 145 მატჩი, 2 გოლი
გამორჩეული ტიტულები: ჩემპიონთა ლიგა, 2-ჯერ ლა ლიგა.
არსებობს მოსაზრება, რომ რეალის 2000-იანების კრიზისი სწორედ მაკელელეს წასვლით დაიწყო. ის იყო საოცრად საიმედო საყრდენი ნახევარმცველი, რომლის არ ყოფნის შემდეგ, მადრიდელთა შუახაზი ჩამოიშალა. ვინ იცის, როგორი იქნებოდა "გალაქტიკოსების" ეპოქა მათ ზურგს უკან კლოდი რომ ყოფილიყო.
რაფაელ ვარანი
წლები რეალში: 2011-2021
შედეგი: 360 მატჩი, 17 გოლი
გამორჩეული ტიტულები: 4-ჯერ ჩემპიონთა ლიგა, 3-ჯერ ლა ლიგა.
ვარანი რეალში მაშინ მივიდა, როდესაც ის სულ რაღაც 18 წლის იყო. ასაკის მიუხედავად, მას ევროპის ყველაზე ტიტულოვან გუნდში დამკვიდრება არ გასჭირვებია. სერხიო რამოსსა და კეპლერ პეპესთან ერთად, რაფაელი ქმნიდა თანამედროვე ფეხბურთის ერთ-ერთ ყველაზე გაუვალ უკანახაზს.
ზინედინ ზიდანი
წლები რეალში: 2001-2006
შედეგი: 230 მატჩი, 49 გოლი
გამორჩეული ტიტულები: ჩემპიონთა ლიგა, ლა ლიგა
ბოლოსთვის კი უდიდესი ფრანგი ფეხბურთელი მოვიტოვეთ. ზიდანმა რეალში ისტორია დაწერა, როგორც მოთამაშემ და როგორც მწვრთნელმა. "გალაქტიკოსების" ეპოქის ყველაზე ელეგანტური წარმომადგენელი, რომლის მიერ გატანილი ბურთი ჩემპიონთა ლიგის 2002 წლის ფინალის მშვენებად იქცა. რაც შეეხება სამწვრთნელო კარიერას, ზინედინმა მადრიდელებს ლიგა ზედიზედ 3-ჯერ მოაგებინა.
აგრეთვე გამოსარჩევია: ედუარდო კამავინგა, ფერლან მენდი, ლუსიენ მიულერი, ორელიენ ჩუამენი.
