ლი კარსლი
ბრიტანელთა 21-წლამდელთა გუნდის ამჟამინდელი მწვრთნელი, რომელმაც გასულ წელს იუნიორებს საქართველოში გამართული ევროპის ჩემპიონატი მოაგებინა. კარსლის ხელში სხვადასხვა დროს გაუვლიათ ფილ ფოდენს, კოულ პალმერს, ენტონი გორდონს, კონორ გალაგერსა და ფეხბურთის დამფუძნებელთა ამჟამინდელი შემადგენლობის სხვა მოთამაშეებს.
როგორც გვახსოვს, ინგლისის მთავარ ნაკრებში გადასვლამდე, 21 წლამდელებში მუშაობდა საუთგეიტიც, თუმცა მისი მოღვაწეობა, საერთო ჯამში, უარყოფითად არის შეფასებული. საინტერესოა, გარისკავენ თუ არა ბრიტანელები იმავე ექსპერიმენტის გამეორებას U21-ის ეროვნული გუნდის კიდევ ერთ დამრიგებელთან.
ფრენკ ლამპარდი
ყველაზე ნაკლებად სავარაუდო ვარიანტი, თუმცა იმის გათვალისწინებით, რომ ლამპარდი ამ დროისთვის თავისუფალია, ის ერთ-ერთ სავარაუდო ვარიანტად მაინც განიხილება. შეგახსენებთ, ფრენკი მუშაობდა დერბი ქაუნთიში, ევერტონსა და ჩელსიში, თუმცა გასული წლის მაისის შემდეგ ის უკლუბოდ არის.
მაურისიო პოჩეტინო
პოჩეტინომ ძალიან კარგი სახელი დატოვა ინგლისურ ფეხბურთში, საუთჰემპტონში, ტოტენჰემსა და "არისტოკრატებში" მუშაობის შემდეგ. ნისლიან ალბიონზე გატარებული 7 წლის მანძილზე, მაურისიომ ჰოტსპური ევროპის ყველაზე პრესტიჟულ საკლუბო ტურნირის ფინალამდეც კი მიიყვანა, სადაც მისმა გუნდმა ლივერპულთან წააგო.
არგენტინელი მწვრთნელი ძალიან კარგად იცნობს "სამი ლომის" ამჟამინდელ კაპიტანსა და ლიდერს, ჰარი კეინს, რომელმაც მის ხელში ჩაატარა 242 შეხვედრა და გაიტანა 167 ბურთი. შეიძლება ითქვას, რომ მათი აღმასვლა პრემიერ ლიგაში ერთობლივი ძალებით დაიწყო. რაც შეეხება "სპურსის" ყოფილი დამრიგებლის ბოლო გუნდს, გასული სეზონის ბოლოს ის სტემფორდ ბრიჯიდან დაითხოვეს.
გრემ პოტერი
მწვრთნელი, რომელსაც ფეხბურთის დამფუძნებელთა ნაკრებში მისვლას დიდი ხანია უწინასწარმეტყველებენ. პოტერმა ყურადღება მიიქცია ბრაიტონში მუშაობით, რომელიც მან პრემიერ ლიგის ერთ-ერთ ყველაზე პერსპექტიულ და იმედისმომცემ გუნდად აქცია. გრემის ფუნდამენტზე მუშაობა მოგვიანებით რობერტო დე ძერბიმ გააგრძელა.
ლამპარდისა და პოჩეტინოს მსგავსად, ჩელსიდან თავის დროზე ალბიონის ყოფილი მწვრთნელიც გაათავისუფლეს. ის უმუშევარია გასული წლის აპრილის შემდეგ, მაგრამ დიდ ფეხბურთში დაბრუნებაზე ინგლისელი დამრიგებელი ყოველდღე ფიქრობს. ვნახოთ, გადაიკვეთება თუ არა ბრიტანელთა ეროვნული გუნდისა და 49 წლის დამრიგებლის გზა.
ტომას ტუხელი
კიდევ ერთი მწვრთნელი, რომელიც თავის დროზე ლონდონელებმა გაათავისუფლეს. იმის მიუხედავად, რომ ტუხელმა ამ გუნდს ევროპის ყველაზე პრესტიჟული საკლუბო ტურნირი მოაგებინა. ტომასი ამ დროისთვის უმუშევარია, რადგან მიუნხენის ბაიერნის უფროსობამ მასთან საერთო ენის გამონახვა ვერ შეძლო.
სეზონის ბოლოს იყო საუბრები გერმანელი მწვრთნელის "რეკორდმაისტერში" დარჩენაზე, თუმცა წასვლა ამჯერად თავად დამრიგებელმა მოინდომა. მის სახელს ასევე, აქტიურად უკავშირებდნენ მანჩესტერ იუნაიტედს, მაგრამ მას შემდეგ, რაც ერიკ ტენ ჰაგის დარჩენა გარდაუვალი გახდა, 50 წლის დამრიგებელი თამაშგარეში დარჩა.
