იტალიის დამარცხებით, ბოსნია თავის ისტორიაში მეორედ მსოფლიო ჩემპიონატზე გავიდა. პლეიოფის გამარჯვებული ნაკრების ფეხბურთელებმა მუნდიალზე მოხვედრა აღნიშნეს ხმაურიანად, ბალკანელთა გუნდის ფორვარდს, ერმედინ დემიროვიჩს კი დანაპირები შეახსენეს.
როგორც ირკევა, სანაკრებო შესვენების წინ, ბოსნიელი თავდამსხმელი შტუტგარტში გამოვიდა ასეთი ინიციატივით - იმ შემთხვევაში, თუ "დრაკონები" მოხვდებოდნენ მუნდიალზე, ის ლუდს უყიდიდა გერმანული კლუბის სტადიონზე დამსწრე ყველა ქომაგს. საინტერესოა, რა თანხა დაუჯდება "შვაბთა" ფორვარდს ეს ყველაფერი?
ნეკარშტადიონი იტევს 60 ათას გულშემატკივარს, ერთი ბოთლი ლუდის ფასი კი ხუთი ევროა. გამოდის, რომ 28 წლის თავდამსხმელს 300 ათასი ევროს დახარჯვა მოუწევს. ბადენელთა მე-9 ნომერს უკან არ დაუხევია, მან უკვე აღნიშნა, რომ ყველაფერი იქნება ზუსტად ისე, როგორც თავიდან თქვა.
"მე ვთქვი, რომ ამას გავაკეთებდი და ასეც იქნება. სასმელზე ყველას დავპატიჟებ. ძვირი დაჯდება, თუმცა თანახმა ვარ, იმ საოცარი მიღწევის შემდეგ, რაც შევძელით. დალიეთ, ფულს მე გადავიხდი", - განაცხადა დემიროვიჩმა.
