2 ოქროს ბუცის მქონე მუნდიალის გმირი, რომელმაც 45 წლის ასაკში ჩოგბურთის კორტზე გადაინაცვლა

ურუგვაის ნაკრების მომავალმა კაპიტანმა პირველად გაიბრწყინა ინდეპენდიენტეში, 2000-იანი წლების დასაწყისში. ახალგაზრდა თავდამსხმელის ხელში ჩაგდებას ცდილობდა არაერთი ევროპული კლუბი და ყველას აჯობა მანჩესტერმა, რომელმაც ბუენოს-აირესელთა მე-18 ნომრის სანაცვლოდ 11 მილიონი გადაიხადა.

"კაჩავაჩამ" რიგ მიზეზების გამო ვერ მოახერხა იუნაიტედში დამკვიდრება და 98 შეხვედრაში მხოლოდ 17 გოლი გაიტანა. ის დროის უმეტეს ნაწილს ატარებდა სათადარიგოთა სკამზე, მაგრამ ამის მიუხედავად, ფორლანის კოლექციაში მაინც ფიგურირებს პრემიერ ლიგის ტიტული, რომელიც მან "წითელ ეშმაკებთან" ერთად 2003 წელს მოიგო.

აშკარა იყო, რომ პრემიერ ლიგა არ იყო ის ადგილი, სადაც ურუგვაელი თავდამსხმელი თავისი პოტენციალის სრულად წარმოჩენას შეძლებდა. 2004 წლის ზაფხულის ბოლოს დიეგო სულ რაღაც 3.2 მილიონად გადავიდა ვილიარეალში და უნდა ითქვას, რომ მისი რეალური ძალა საფეხბურთო სამყარომ სწორედ პრიმერაში იხილა.

ვალენსიელების თავდამსხმელი 25 გოლით სადებიუტო სეზონშივე გახდა ოქროს ბუცისა და პიჩიჩის ტიტულის მფლობელი. მოგვიანებით, ის ორი სეზონის მანძილზე "სუბმარინას" მაისურით კიდევ 34 ბურთს გაიტანს. გამოსარჩევი იყო "კაჩავაჩასა" და ხუან რომან რიკელმეს დუეტი, რომელმაც 2006 წელს "ყვითელი წყალქვეშანავი" ჩემპიონთა ლიგის 1/2 ფინალამდე მიიყვანა. 

მანუელ პელეგრინის შეგირდებმა ჯგუფში ჩატოვეს "მანკუნიანელები", მეოთხედფინალში კი მილანის ინტერის ბარიერი იქნა გადალახული. მოკრძალებული კლუბი 1/2 ფინალში შეაჩერა ლონდონის არსენალმა, მაგრამ უნდა ითქვას, რომ ელ მადრიგალის ბინადრებს ფინალში გასასვლელად ძალიან ცოტა დააკლდათ.

ვილიარეალში კარიერის რეანიმირების შემდეგ, ფორლანი 21 მილიონ ევროდ გადავიდა მადრიდის ატლეტიკოში, რომლის შემადგენლობაში მან კიდევ ერთხელ მოიპოვა ევროპისა და ლა ლიგის საუკეთესო გოლეადორის ტიტული. შედეგიანობის მხრივ, ურუგვაელი ფორვარდისთვის 2008/09 წლების სეზონი გამოდგა საუკეთესო: 45 მატჩი, 35 ბურთი.

დიეგო "ინდიელებთან" ერთად მოგვიანებით მოიგებს ევროპა ლიგას, თანაც ისე რომ ფულჰემის კარში შესრულებული დუბლით ის ფინალის საუკეთესო მოთამაშედ დასახელდება. რამდენიმე თვის შემდეგ, "როხიბლანკოს" ლიდერი უეფას სუპერთასსაც აღმართავს. ეპოქალური მეწყვილე მას ჰყავდა ვისენტე კალდერონზეც, საუბარი სერხიო აგუეროს შესახებ არის.

ატლეტიკოს მეშვიდე ნომერი 2010 წლის მსოფლიო ჩემპიონატამდეც ითვლებოდა ტოპ თავდამსხმელად, თუმცა სამხრეთ აფრიკაში გამართულ ტურნირზე მან ნამდვილი ფურორი მოახდინა. მუნდიალის საუკეთესო ბომბარდირისა და მოთამაშის ტიტული, ასევე ტურნირის საუკეთესო გოლის ავტორი, ყველაფერი ეს "კაჩავაჩას" შესახებ არის.

ურუგვაის ნაკრებმა ფორლანის ლიდერობით მიაღწია მსოფლიო ჩემპიონატის ნახევარფინალს, სადაც დრამატულ ბრძოლაში ნიდერლანდების ეროვნულ გუნდთან წააგო. ურუგვაელმა ფორვარდმა "სელესტე" დააბრუნა მსოფლიო ფეხბურთის რუკაზე და ერთი წლის შემდეგ, მან თავის ეროვნულ გუნდს კოპა ამერიკაც მოაგებინა.

2011 წლის ზაფხულში დიეგო გადავიდა "ნერაძურიში", რომელიც ზაფხულის ბოლო დღეებში მახაჭკალის ანჟიში გადასულ სამუელ ეტო'ოს შემცვლელს ეძებდა. "გველების" ფორვარდმა ვერ შეძლო კალჩოში დამკვიდრება და ერთი სეზონის შემდეგ, ის ახალი თავგადასავლების ძებნას შეუდგა. კარიერის ბოლო წლებში, ურუგვაელთა 10-იანმა მოიარა ბრაზილიური, მშობლიური, იაპონური, ინდური და ჰონ კონგური კლუბები.

2018 წელს, "კაჩავაჩა" ფეხბურთიდან საბოლოოდ წავიდა. 812 შეხვედრა და 310 გატანილი გოლი - ასეთი მონაგარი დატოვა ლეგენდარულმა თავდამსხმელმა მოფლიო ფეხბურთში. ლუის სუარესისა და ედი კავანის გამოჩენამდე, "სელესტეს" ყველა დროის საუკეთესო გოლეადორი 35 ბურთით სწორედ ფორლანი იყო.

დიდი ჩოგბურთი

როგორც აღვნიშნეთ, ყოფილმა ურუგვაელმა თავდამსხმელმა ცოტა ხნის წინ, საჩოგბურთო კარიერა დაიწყო. ის ითამაშებს ურუგვაის ღია პირველობაზე, დიეგოს მეწყვილე კი 101-ე ნომერი, ფედერიკო კორია იქნება. ტურნირი დაიწყება 11 ნოემბერს, ყოფილ ფეხბურთელს უაილდ ქარდი უკვე აქვს. აღსანიშნავია ის ფაქტი, რომ ატლეტიკოს ყოფილი ფორვარდი თინეიჯერობაში სწორედ ჩოგბურთს თამაშობდა.

ურუგვაის ნაკრების ყოფილმა ათიანმა მოგვიანებით აირჩია ფეხბურთი, თუმცა როგორც ვხედავთ, ძველ გატაცებას ის მაინც მიუბრუნდა. ვნახოთ, იქნება, თუ არა "კაჩავა" კორტზე ისეთივე ეფექტური და შედეგიანი, როგორც ის საფეხბურთო მოედანზე იყო.