ბორდოს უკანასკნელი ხუთი წელი - მუდმივი ბრძოლა გადარჩენისთვის. კლუბი ოფიციალურად გაკოტრდა და აღმოჩნდა პირველ რეგიონალურ დივიზიონში, რომელიც ფრანგული საკლუბო ფეხბურთის იერარქიაში მე-6 ლიგა არის. პანდემიის დროს დაწყებული კრიზისი საბოლოოდ ფსკერზე დაშვებით დასრულდა.
2024 წლისთვის ჟირონდული გუნდის დავალიანება შეადგენდა 40 მილიონამდე ევროს - თანხა, რომლის გადახდა ვერ მოხერხდა, რის გამოც კლუბი თავიდან მე-3 ლიგაში დააქვეითეს. აღნიშნულ საფეხურზე ადგილის შენარჩუნების მიზნით, "ლურჯების" ბიუჯეტში მიმდინარე წლის 30 ივნისამდე უნდა ყოფილიყო მინიმუმ 10 მილიონამდე, მაგრამ კლუბისთვის აღნიშნული თანხაც მიუწვდომელი გამოდგა.
შედეგად, როგორც აღვნიშნეთ, სტად ატლანტიკის ბინადრები ახალ სეზონს მეექვსე დივიზიონში დაიწყებენ. საუბარია გუნდის შესახებ, რომელიც საფრანგეთის ჩემპიონი თავისი ისტორიის მანძილზე 6-ჯერ გამხდარა. ბორდოზე ტიტულოვანი კლუბი ლიგა 1-ში არის მხოლოდ პარი სენ-ჟერმენი (14), მარსელი (10), სენტ-ეტიენი (10), მონაკო (8), ნანტი (8) და ლიონი (7).
ჟირონდული გუნდის ბოლო ჩემპიონობა იყო არც ისე დიდი ხნის წინ, 2009 წელს. ამის გარდა, მეექვსე დივიზიონის ამჟამინდელი ბინადრები 1985 წელს გავიდნენ ევროპის მთავარი საკლუბო ტურნირის 1/2 ფინალში, რომელშიც "ლურჯებმა" მხოლოდ მომავალ ჩემპიონ ტურინის იუვენტუსს ვერ მოუგეს.
ბორდოში სხვადასხვა დროს არაერთ გამორჩეულ ფეხბურთელს უთამაშია. სია ნამდვილად შთამბეჭდავია - ზინედინ ზიდანი, ჟან ტიგანა, ალენ ჟირესი, ჟან-პიერ პაპენი, ერიკ კანტონა, დიდიე დეშამი, ბიქსენტ ლიზარაზუ, სილვიენ ვილტორი და სხვები. თანამედროვე ვარსკვლავებიდან: ორელიან ჩუამენი და ჟიულ კუნდე.
როგორც გვახსოვს, ზურიკო დავითაშვილის ევროპული თავგადასავალი ასევე ჟირონდაში დაიწყო. უნდა აღვნიშნოთ ქართულ ფეხბურთთან ახლოს მყოფი კიდევ ერთი პიროვნება, ჩვენი ეროვნული გუნდის დამრიგებელი, ვილი სანიოლი, რომელიც "ლურჯების" რიგებში 2014-2016 წლებში მუშაობდა.
საფრანგეთის ნაკრების სხვადასხვა ასაკობრივ გუნდებში მწვრთნელობის შემდეგ, სტად ატლანტიკის ბინადრები იყვნენ პირველები, ვინც "ჯვაროსნების" ამჟამინდელ დამრიგებელს მთავარ გუნდში დაუძახეს. ვნახოთ, შეძლებს თუ არა ბორდო დაბრუნებას და პსჟ-სთვისა თუ ოლიმპიკისთვის კონკურენციის გაწევას ისე, როგორც ადრე.
