RAF Georgia-ს გამართვამდე მოჭიდავეებმა პრესკონფერენცია გამართეს. შეგახსენებთ, რომ ივენთი გაიმართება 11 ივლისს, 20:00 საათზე. პრესკონფერენციას დაესწრო მერაბ დვალიშვილი, რომლის მოწინააღმდეგე ჰენრი სეხუდო იქნება. ქართველმა მებრძოლმა რამდენიმე კითხვას უპასუხა.
"როგორც იცით, იანთან წაგების დღიდან ვიცი ჩემი მეტოქის ვინაობა. ვემზადები მასთან ტრილოგიისთვის - როგორც მენტალურად, ისე ფიზიკურადაც. ეს ალბათ შემოდგომაზე მოხდება. იცით, რომ აქტიურობა მჩვევია. ღმერთის წყალობით, დავიბრუნებ ქამარს და გავაგრძელებ ტიტულის აქტიურად დაცვას.
სამშობლოში ასპარეზობა განსაკუთრებული პასუხისმგებლობაა, თუმცა მე პროფესიონალი მებრძოლი ვარ და ჩემს მაქსიმუმს გავაკეთებ აქაც და სხვა ქვეყანაშიც, მეტიც, სხვა ქვეყანაში ალბათ უფრო მეტად ვარ მოტივირებული. 1 კვირის წინ ჩამოვედი თბილისში და ჩვენი ქართველი მოჭიდავეების, განსაკუთრებით ავთანდილ კენჭაძის დახმარებით ვემზადები ამ ორთაბრძოლისთვის.
მადლობას ვუხდი მათ. მგონია, რომ სათანადოდ მოვემზადე, რათა ღირსეულად ვეჭიდავო სეხუდოს. ქართველ გულშემატკივრებს დიდი როლი ექნებათ ხვალ. ბრძოლის დროს ძალიან მშვიდად ვარ ხოლმე და თავს კომფორტულად ვგრძნობ, წინა ჭიდაობის დღეს, გახურებისას კი ვნერვიულობდი.ეს ჩემთვის გამოწვევაა და ვნახოთ, როგორ გავუმკლავდები ამას. ვეცდები, ჰენრი სპორტის მისივე სახეობაში დავამარცხო", - განაცხადა "მანქანამ".
