დადასტურებულად — ბრედლი ბარკოლა პარი სენ-ჟერმენთან ახალ კონტრაქტს არ გააფორმებს! ფრანგმა ფეხბურთელმა ამ გადაწყვეტილების შესახებ კლუბის ხელმძღვანელობას უკვე აცნობა. როგორც ჩანს, 23 წლის ფეხბურთელი მიმდინარე სატრანსფერო ფანჯრის პერიოდში სხვა გუნდში გადასვლას სერიოზულად განიხილავს.
იმის მიუხედავად, რომ პარი სენ-ჟერმენს ბარკოლას შენარჩუნება სურს და მხარეები ახალ კონტრაქტზე უკვე რამდენიმე თვეა მუშაობენ, ფრანგ ფეხბურთელს სულ სხვა გეგმები აქვს და ფაქტია, რომ ახალ გამოწვევას ეძებს.
შეგახსენებთ, ბარკოლას პარიზულ კლუბთან მოქმედი კონტრაქტი 2028 წლამდე აკავშირებს, მისი სატრანსფერო ღირებულება კი დაახლოებით €150 მილიონია. გავრცელებული ინფორმაციით, ფრანგი ფეხბურთელით ლივერპული, ჩელსი, არსენალი და ბაიერნი ინტერესდებიან, რაც იმას ნიშნავს, რომ უახლოეს კვირებში 23 წლის ვინგერის მომავალთან დაკავშირებით უფრო მეტ სიახლეს შევიტყობთ.
