მიუხედავად იმისა, რომ სერხიო პერესმა რედ ბულთან ახალი კონტრაქტი რამდენიმე კვირის წინ გააფორმა, მისი მომავალი მაინც გაურკვეველია და შესაძლოა, გუნდის დატოვება მოუწიოს.
34 წლის მექსიკელი პილოტის შედეგებით გუნდის ხელმძღვანელობა უკმაყოფილოა და მას სიტუაციის გამოსასწორებლად ორი რბოლა მისცეს — თუ პერესი უნგრეთში და ბელგიაში სასურველ შედეგს ვერ აჩვენებს, რედ ბული მის კონტრაქტს გადახედავს.
"ფორმულა 1-ში ყველა კონტრაქტს აქვს გადახედვის პუნქტი, რომელიც ძირითადად პილოტის მიერ ნაჩვენებ შედეგებზეა დამოკიდებული. ზაფხულის შესვენებაზე აღნიშნულ საკითხს დეტალურად განვიხილავთ და გადაწყვეტილებას მივიღებთ" — განაცხადა რედ ბულის დირექტორმა, ჰელმუტ მარკომ.
მიმდინარე სეზონში სერხიო პერესმა 12 რბოლიდან მხოლოდ 4-ჯერ მოახერხა პოდიუმზე ასვლა და 118 ქულით მე-6 ადგილზე იმყოფება. აღსანიშნავია, რომ მექსიკელი მრბოლელი თანაგუნდელს, მაქს ვერსტაპენს 137 ქულით ჩამორჩება.
რედ ბული პერესის საკითხს ზაფხულის შესვენების შემდეგ განიხილავს — მექსიკელი შესაძლოა გუნდიდან გაუშვან
209901210268
