21 ივნისს ლევან ჩოხელი და ოთარ თანზილოვი UFC-ში თავიანთ სადებიუტო ბრძოლას გამართავენ. მოვლენა ნამდვილად გამორჩეულია, რადგან ალექსანდრე თოფურიას შემდეგ, მსოფლიოს მთავარ პრომოუშენში ახალი ქართველი სახეები აღარ გამოჩენილან. მათი პირველი ჩხუბის წინ, გავიხსენოთ თუ როგორი დებიუტი ჰქონდათ ჩვენს მებრძოლებს UFC-ში.
ალექსანდრე თოფურია V კოლბი თიქნესი | UFC 312: Du Plessis vs. Strickland 2 | 08/02/2025 | მოგება, ერთსულოვანი გადაწყვეტილებით
თოფურიასა და თიქნესის ბრძოლა საკმაოდ საინტერესო და მნიშვნელოვანი მოვლენა იყო, რადგან ორივე სპორტსმენისთვის ეს UFC-ში სადებიუტო ჩხუბს წარმოადგენდა. ამ დუელს დამატებითი ინტრიგა იმიტომ ჰქონდა, რომ კოლბი ალექს ვოლკანოვსკის გუნდელია და ლეგენდარული ქვემსუბუქწონოსანი მის კუთხეში იყო.
ალექსანდრეს მხარეს კი რა თქმა უნდა, ილია თოფურია იდგა. გამომდინარე იქიდან, რომ დაუმარცხებელმა ჩემპიონმა ავსტრალიელი მეტოქე დაამარცხა, ძმებისა და მეგობარი გუნდელების დუელს მედიამ დიდი ყურადღება დაუთმო. რაც შეეხება შედეგს, ქართველმა სუპერმსუბუქწონოსანმა ერთსულოვანი გადაწყვეტილებით მოიგო.
გიგა ჭიკაძე V ბრენდონ დევისი | UFC on ESPN+ 18: Hermansson vs. Cannonier | 28/09/2019 | მოგება, გაყოფილი გადაწყვეტილებით
ჭიკაძემ UFC-თან კონტრაქტი ბრძოლამდე სულ რაღაც ორი კვირით ადრე გააფორმა, მას შემდეგ, რაც დევისის თავდაპირველი მეტოქე ტრავმის გამო ჩხუბს ჩაეხსნა. გიგას არ ჰქონდა სრულფასოვანი მოსამზადებელი კემპი, მაგრამ შანსი მან ხელიდან არ გაუშვა. ბრენდონი კი იმ დროისთვის უკვე გამოცდილი მებრძოლი იყო, რაც ქართველი ქვემსუბუქწონოსნისთვის დიდ გამოცდას ნიშნავდა.
რაც შეეხება შედეგს, აქ ერთი სახალისო და უცნაური ფაქტი მოხდა - ბრიუს ბაფერმა შეცდომით გამოაცხადა, რომ ბრძოლა ფრედ დასრულდა, თუმცა რამდენიმე წამში შეცდომა გამოასწორა, ბოდიში მოიხადა და მოგებულად "ნინძა" გამოაცხადა. მან აღნიშნულ ჩხუბში გაყოფილი გადაწყვეტილებით იმარჯვა.
რომან დოლიძე V ხადის იბრაგიმოვი | UFC Fight Night: Figueiredo vs. Benavidez 2 | 18/07/2020 | მოგება, ნოკაუტით
დოლიძე UFC-ის ერთადერთი ქართველი მებრძოლია, ვინც სადებიუტო დაპირისპირებაში მეტოქე ნოკაუტით დაამარცხა. ეს ჩხუბი ჩვენთვის განსაკუთრებით ტკბილი კიდევ იმიტომ არის, რომ რომანმა რუსი მოწინააღმდეგე გათიშა. აღნიშნული დუელი არ ყოფილა ხანგრძლივი, მაგრამ იმდენად ეფექტური გამოდგა, რომ ქართველმა ქვემძიმეწონოსანმა მაშინვე მიიპყრო შერეული საბრძოლო ხელოვნებების სამყაროს ყურადღება.
პირველი რაუნდის დასრულებამდე დაახლოებით წუთნახევრით ადრე, იბრაგიმოვმა გადაწყვიტა წინ მისვლა და მარცხენა ხელით ძლიერი დარტყმის შესრულება. "კავკასიელმა" აღნიშნული მომენტი იდეალურად წაიკითხა: მან თავი ოდნავ გვერდზე გადაწია, დარტყმას აუარა და ზუსტად იმავე წამს ხადისს მუხლი პირდაპირ ყბაში მოარტყა.
მერაბ დვალიშვილი V ფრენკი საენცი | UFC Fight Night 123: Swanson vs. Ortega | 09/12/2017 | წაგება, გაყოფილი გადაწყვეტილებით
დვალიშვილი UFC-ში Ring Of Combat-ის ჩემპიონის სტატუსით გადავიდა და მის მიმართ დიდი მოლოდინები იყო, თუმცა პირველივე ბრძოლაში მას ძალიან გამოცდილი ვეტერანი, საენცი შეახვედრეს. ჩხუბის დასრულებისას ბევრს ეგონა, რომ მერაბმა მინიმუმ 2 რაუნდი (1-ელი და მე-3) მოიგო. ქართელმა სუპერმსუბუქწონოსანმა 11 თეიქდაუნი შეასრულა, რაც დებიუტისთვის წარმოუდგენელი ციფრია.
მსაჯებმა ჩათვალეს საპირისპიროდ, თითქოს ფრენკის დარტყმები დგომში უფრო ეფექტური და დამაზიანებელი იყო, ვიდრე "მანქანის" გდებები. შედეგად: დვალიშვილის წაგება გაყოფილი გადაწყვეტილებით. მიუხედავად ოფიციალური მარცხისა, აღნიშნულმა ჩხუბმა დაანახა ყველას, რომ მერაბი ფენომენალური ფიზიკური მონაცემების მქონე სპორტსმენია.
ლიანა ჯოჯუა V სარა მორასი | UFC 242: Khabib vs. Poirier | 07/09/2019 | წაგება, ნოკაუტით
ჯოჯუამ სადებიუტო ბრძოლა ჩაატარა ივენთზე, რომლის მთავარ დაპირისპირებაში ხაბიბმა პორიე დაამარცხა. რაც შეეხება უშუალოდ UFC-ის დებიუტანტს, ჩხუბი 61 კილოგრამში უნდა გამართულიყო, მაგრამ მორასმა წონა ვერ ჩააბარა. ბრძოლა მაინც შედგა, თუმცა მოწინააღმდეგეს ჯარიმის სახით თავისი ჰონორარის 20% ლიანასთვის უნდა გადაეხადა.
სარა უშუალოდ ბრძოლის დროსაც ბევრად დიდი და ძლიერი ჩანდა. მესამე რაუნდის ბოლოს მსაჯმა დააფიქსირა, რომ ქართველი მებრძოლი პასიურ თავდაცვაში იყო და დიდი რაოდენობით დარტყმებს უშვებდა, რის გამოც ჩხუბი გააჩერა. მოგება მიეკუთვნა კანადელ სუპერმსუბუქწონოსანს, ნოკაუტით.
გურამ ქუთათელაძე V მატეუშ გამროტი | UFC Fight Night: Ortega vs. Korean Zombie | 17/10/2020 | მოგება, გაყოფილი გადაწყვეტილებით
ქუთათელაძე აღარ არის UFC-ში, მის მიერ სადებიუტო ბრძოლაში დამარცხებული გამროტი კი მსუბუქი წონითი დივიზიონის ტოპ 15-ში ამჟამად მე-7 პოზიციას იკავებს. გამოსარჩევია ისიც, რომ გურამთან წაგების შემდეგ, მატეუშმა მოუგო რაფაელ დოს ანიოსს, არმან ცარუკიანსა და რაფაელ ფიზიევს.
დავუბრუნდეთ 2020 წლის 17 ოქტომბერს გამართულ ბრძოლას, რომელიც იმ ივენთზე საღამოს საუკეთესო დაპირისპირებადაც დასახელდა. ჩხუბის დასრულების შემდეგ, მსაჯთა აზრი გაიყო. 2-მა მათგანმა დააფიქსირა 29-28 ქართველი მსუბუქწონოსნის სასარგებლოდ, ხოლო 1-მა, 29-28 მისი პოლონელი ოპონენტის.
ზვიად ლაზიშვილი V ჯონათან მარტინესი | UFC Fight Night: Costa vs. Vettori | 23/10/2021 | წაგება, ერთსულოვანი გადაწყვეტილებით
ლაზიშვილმა UFC-ში მხოლოდ ერთი ბრძოლის ჩატარება მოასწრო. საუბარია მარტინესთან დაპირისპირების შესახებ, რომელიც მან მსაჯების ერთსულოვანი გადაწყვეტილებით წააგო. საინტერესო ისიც, რომ მსოფლიოს მთავარ პრომოუშენში მოხვედრამდე, ზვიადს ზურგს უმაგრებდა LFA-ს ჩემპიონობა და 13-ჩხუბიანი დაუმარცხებელი სერია.
ჯონათანთან წარუმატებელი გამოსვლა არ აღმოჩნდა ქართველი მებრძოლის ერთადერთი პრობლემა - დაპირისპირების შემდეგ გავრცელდა ინფორმაცია, რომ ზიკომ დოპინგ-ტესტი ვერ გაიარა, რადგან მის ორგანიზმში აღმოჩნდა აკრძალული ნივთიერება კლომიფენი. როგორც თავად ლაზიშვილმა განმარტა, მკურნალობის მიზნით, ექიმის დანიშნულებით ჰქონდა მიღებული.
ამის გამო ზვიადს ცხრათვიანი დისკვალიფიკაცია მისცეს, UFC-მ კი კონტრაქტი გაუწყვიტა. ამერიკელ მებრძოლთან მარცხისა და დოპინგ-ტესტზე ჩავარდნის შემდეგ, ქართველი სუპერმსუბუქწონოსანი ოქტაგონში აღარ გამოჩენილა. რაც შეეხება მის წაუგებელ სერიას, ის 2011 წლის თებერვლიდან-2020 წლის სექტემბრამდე გრძელდებოდა.
ლევან მაყაშვილი V მარკ ედივა | UFC Fight Night 66: Edgar vs. Faber | 16/05/2015 | მოგება, გაყოფილი გადაწყვეტილებით
პირველი ქართველი მებრძოლი UFC-ში და შესაბამისად, პირველი გამარჯვებაც. მაყაშვილის წარმატება ორმაგად განსაკუთრებული იყო იმით, რომ მან ედივას მოუგო მის მშობლიურ მიწაზე, ფილიპინებში. ჩხუბი გადაწყვეტილებამდე მივიდა და მიუხედავად იმისა, რომ მთელი დარბაზი ელოდა მარკის ტრიუმფს, მსაჯები გაყოფილად ლევანისკენ გადაიხარნენ.
ამ გამარჯვებით "ბზიკმა" ქართული დროშა UFC-ში პირველად აღმართა და გზა გაუკაფა მომავალ თაობებს. მიუხედავად იმისა, რომ მსოფლიოს მთავარ პრომოუშენში მაყაშვილმა მხოლოდ 3 ჩხუბი ჩაატარა (1 მოგება, 1 წაგება, 1 ფრე), ის სამუდამოდ დარჩება ისტორიაში, როგორც პიონერი. დიახ, პირველი სწორედ ლევანი იყო.
ილია თოფურია V იუსეფ ზალალი | UFC Fight Night: Moraes vs. Sandhagen | 10/10/2020 | მოგება, ერთსულოვანი გადაწყვეტილებით
ეს არის ბრძოლა, საიდანაც ოფიციალურად დაიწყო თოფურიას ეპოქა UFC-ში! ის მსოფლიოს მთავარ პრომოუშენში ფენომენალური, დაუმარცხებელი 8-0 რეკორდით შევიდა და ყველა ჩხუბი ილიას ვადაზე ადრე ჰქონდა მოგებული. აღნიშნულ დუელს ერთი უდიდესი სირთულე ახლდა: გამოწვევა ქართველმა ქვემსუბუქწონოსანმა დაპირისპირებამდე სულ რაღაც 8 დღით ადრე მიიღო, მას შემდეგ, რაც ზალალის პირველი ოპონენტი ივენთს ჩაეხსნა.
მიუხედავად იმისა, რომ "ელ მატადორს" წონის კლებისთვისა და კარდიოსთვის მოსამზადებლად დრო თითქმის არ ჰქონდა, მან პირველივე წამებიდანვე აჩვენა უმაღლესი კლასი. ჩხუბი მივიდა გადაწყვეტილებამდე და 3-ვე მსაჯმა მოგება სწორედ თოფურიას მისცა. აღნიშნული დუელი შედგა 6 წლის წინ და რა მოხდა შემდეგ, ეს უკვე ისტორიაა.
UFC-ის ახალი ქართველი სახეების დებიუტის მოლოდინში - ლევან ჩოხელი და ოთარ თანზილოვი
ორივე მებრძოლის დებიუტი შედგება UFC Vegas 119-ზე, 21 ივნისს. Bellator-ში 2024 წლის სექტემბერში ბოლო დაპირისპირების ჩატარების შემდეგ, დაიწყო აქტიური საუბრები იმაზე, რომ ჩოხელის შემდეგი ნაბიჯი სწორედ მსოფლიოს მთავარ პრომოუშენში მოხვედრა იქნებოდა. 2026 წლის ივნისისთვის ასეც მოხდა.
ლევანის მეტოქე იქნება UFC-ის ასევე დებიუტანტი, ლეონ შაჰბაზიანი (12 გამარჯვება, 4 მარცხი). შეგახსენებთ, რომ თავად ჩვენმა მებრძოლმა პროფესიონალურ კარიერაში ჩაატარა 17 ჩხუბი, 14 მოიგო, 3 წააგო, 1 დუელიც No Contest გამოცხადდა. გამოსარჩევია ისიც, რომ ქართველმა ქვესაშუალოწონოსანმა 11 დუელი ნოკაუტით მოიგო.
რაც შეეხება თანზილოვს, UFC Vegas 119-ის დაწყებამდე რვა დღით ადრე გახდა ცნობილი, რომ ამ ივენთზე ისიც იბრძოლებს. მისი მეტოქე ასევე დებიუტანტი, წაუგებელი შეინ კოლინსი (7-0) იქნება. ოთარის ანგარიშზეა 10 მოგება (7 ნოკაუტით, 3 გადაწყვეტილებით) და 1 წაგება. ის ერთადერთი მარცხი მოხდა 2024 წლის სექტემბერში, Dana White's Contender Series-ში.
ქართველი მებრძოლი იმ დაპირისპირებაში მსაჯების გაყოფილი გადაწყვეტილებით ჯოსიას მუსასასთან დამარცხდა. იმის შემდეგ, მან გილიერმო ტორესს მოუგო. როგორც ვხედავთ, ქართველი სუპერმსუბუქწონოსანი მსოფლიოს მთავარ პრომოუშენთან ახლოს იყო ჯერ კიდევ 2 წლის წინ და ის თავის მიზნისკენ მაინც მივიდა.
