ლუბა 2022 წელს ევროპის ვიცეჩემპიონი გახდა, ასევე ვერცხლის მედალი მოიპოვა ევროპულ თამაშებზე 2019 წელს. საქართველოს ნაკრებმა გოლოვინასთან ერთად, ჩვენი ქვეყნის ისტორიაში პირველად, მსოფლიოს ჩემპიონატზე გუნდური მესამე ადგილი დაიკავა (2023 წ. ), წელს კი პორტუგალიაში გამართულ ევროპის ჩემპიონატზე საქართველოს ნაკრებმა გუნდურ ასპარეზობაში ვერცხლის მედალი მოიპოვა.
პარიზის ოლიმპიადის სამზადისისა და მოლოდინის შესახებ, ლუბა გოლოვინამ La Gazzetta dello Sport Georgia-სთან ინტერვიუში ისაუბრა.
- მე-4 ოლიმპიადაზე მიდიხარ, ამ პერიოდში მედლები მოიპოვე, დააგროვე მეტი გამოცდილება, ფიქრობ, რომ ახლა კარიერის საუკეთესო ფორმაში ხარ?
- ყველა შეჯიბრი გამოცდილებაა. უკვე დავიწყე მომზადება, მაისის ბოლოს შეკრება გვექნება ბათუმში, სადაც გავივლით ფიზიკურ ვარჯიშებს, რადგან შესაბამისი ბატუტი მანდ არაა. შემდეგ დავიწყებთ მომზადებას, ოლიმპიადამდე, ივლისის დასაწყისში გაიმართება მსოფლიოს თასი პორტუგალიაში, სადაც ერთი კვირით ადრე წავალთ და შეკრებას გავივლით. შემდგე კი ოლიმპიური თამაშებისთვის მოვემზადებით.
- როცა გაგიგე რომ პარიზის ოლიმპიური თამაშების ლიცენზია მოიპოვე და უკვე ოფიციალურად დადასტურდა, რა განცდა გქონდა?
- მე-4 ოლიმპიადაზე ვიასპარეზებ, ეს ადვილი ნამდვილად არაა, რთულია. პირველი ემოცია ისეთიც არ იყო, როგორც წარმომედგინა. ემოციურად ძალიან გადაღლილი ვიყავი. ვიდრე ოფიციალურად გადაწყდებოდა და შესაბამისი დოკუმენტი გამზადდებოდა, ვიცოდი ჩემი ქულები და ვიცოდი რომ ვიყავი ლიცენზიანტი, თუმცა მოგეხსენებათ, ტოკიოს ოლიმპიური თამაშებიდან გამომდინარე, წინასწარ ვერაფერს ვამბობ. მაშინაც უნდა წავსულიყავი, მაგრამ საბოლოოდ ოლიმპიადის მიღმა დავრჩი. ერთი წამით არ მოვდუნებულვარ, პარიზის ოლიმპიური თამაშების მონაწილეთა სია როცა ვნახე, აეროპორტში ვიყავი, პორტუგალიაში მივფრინავდით. ამბის გაგების შემდეგ ავტირდი, აეროპორტში ყველა მე მიყურებდა, შემდეგ ამოვისუნთქე და მშვიდად დავიძინე.
- პორტუგალიაში ევროპის ჩემპიონატზე გუნდურ ასპარეზობაში აიღეთ ვერცხლის მედალი და მსოფლიოს ჩემპიონატზე ბრინჯაო, ეს შედეგები რამდენად გაძლევს მოტივაციას?
- ძალიან ძლიერი გუნდი გვყავს, მსოფლიოს ჩემპიონატზე მესამე ადგილზე გავედით, რაც საქართველოსთვის ისტორიული შედეგი იყო. ასევე ევროპის ჩემპიონატზე ვერცხლი მოვიპოვეთ, ჩვენ უკვე გვქონდა ვერცხლი და ოქრო გვინდოდა, თუმცა სპორტია და ყველაფერი ისე არაა, როგორც ჩვენ გვინდა ხოლმე. მეორე ადგილი ცუდი შედეგი არ არის ჩვენი ახალგაზრდა გუნდისთვის, რადგან მე-3 წელია, რაც ეს გუნდი გვყავს. ეს ყველაფერი დიდი სტიმულია ჩვენთვის, მედალი სპორტსმენისთვის არის იმ შრომისა და შედეგის დაფასება, რასაც ყოველდღიურად ვდებთ ვარჯიშებზე. ჩემთვის წარმატება სტიმულთან ერთად მოტივაციასაც ნიშნავს - რომ მე შემიძლია უფრო მაღალი მიზნებისთვის ვიბრძოლო.
- 8 წლიანი პაუზა გამოგდის ოლიმპიადებს შორის, რადგან ტოკიოს ოლიმპიური თამაშების გამოტოვება მოგიწია. ამ პერიოდის განმავლობაში ევროპულ თამაშებზე ვერცხლის მედალი მოიპოვე 2019 წელს, ევროპის ვიცეჩემპიონი გახდი 2022 წელს, 2016 წლიდან დღემდე პროფესიულად რამდენად გაიზარდე?
- უკვე დიდი სტაჟი მაქვს სპორტში, ვცდილობ შეჯიბრიდან - შეჯიბრამდე გავიზარდო, გავაუმჯობესო ჩემი შესაძლებლობა ინდივიდუალურ ხტომებში, პროგრამულად გავიზარდო, არავის ჰქონდეს პრეტენზია და ქულის დაკლების საბაბი, ღირსეულად წარვადგინო საქართველო. ამ პერიოდში აღებული მედლები ჩემთვის დიდი შედეგია. ევროპულ თამაშებსა და ევროპის ჩემპიონატზე, მიუხედავად იმისა რომ ტურნირამდე ერთი თვით ადრე ხელის ტრავმა მქონდა მიღებული, მაინც შევძელი და მეორე ადგილი დავიკავე, ეს ყველაფერი იმას ნიშნავს, რომ ტრავმების მიუხედავად, ბრძოლა შემიძლია. საკმაოდ ბევრი ტრავმა მაქვს, როცა საშეჯიბრო პერიოდში სრულყოფილი ვარჯიში მიწევს, ხერხემლის ტრავმა ძლიერდება, მაგრამ ვცდილობ გავიყუჩო, თუ ეს ვერ ჩერდება ტკივილთან ერთად მიწევს ბატუტზე ასვლა.
- რა მოლოდინი გაქვს პარიზის ოლიმპიადისგან?
- ჩემს პროგრამას რომ გადავხედო, რაც შემიძლია და რასაც ვაკეთებ, ქულებით ძალიან ახლოს ვარ საპრიზო ადგილთან, შეიძლება ითქვას, რომ სამეულში სულ უნდა ვიყო, მაგრამ გარკვეული ფაქტორები ყოველთვის ხელს მიშლის, მათ შორის ფსიქოლოგიურ ფაქტორი, იმიტომ რომ საკმაოდ პასუხისმგებლობით სავსე ადამიანი ვარ, ეს კი ალბათ ემოციურად ხელს მიშლის. ახლა მაგაზე ვმუშაობ, რომ ფსიქოლოგიურად კარგად მოვემზადო, ვიყო გაწონასწორებული, რა თქმა უნდა, მსაჯებზეცაა დამოკიდებული ქულების მონიჭება, მაგრამ ამ ეტაპზე ყველაზე მთავარია ვიყო კარგად მომზადებული და სრულყოფილად, მთელი სიზუსტით შევასრულო ჩემი პროგრამა, ჩემი მაქსიმუმი.
- მსაჯებზე რას იტყვი?
- მსაჯებზეა დამოკიდებული ჩვენი შედეგი, ზოგმა შეიძლება შეცდომა დაინახოს და დაბალი ქულა დაწეროს, სხვამ შეიძლება ეს არ დაინახოს, ყველას ჰყავს თავისი სპორტსმენი და რა თქმა უნდა, სურთ მათმა ქვეყანამ აიღოს მედალი.
- რას ეტყვი გულშემატკივრებს?
- გულშემატკივრებს ვპირდები, რომ ძალებს არ დავზოგავ და ყველანაირად ვეცდები ჩემი მაქსიმუმის გამოვლენას.
შეგახსენებთ, XXXIII ოლიმპიური თამაშებს საფრანგეთის დედაქალაქი პარიზი 26 ივლისიდან 11 აგვისტოს ჩათვლით უმასპინძლებს.
