ოფიციალურად დადასტურდა, რომ თემურ ქეცბაიამ კვიპროსის ნაკრები დატოვა. აღნიშნული ინფორმაცია ქვეყნის ფეხბურთის ფედერაციის პრეზიდენტმა, გიორგიოს კუმასმა დაადასტურა:
"ბატონ ქეცბაიასთან გვქონდა საუბარი, რომლის მსვლელობისას შევთანხმდით იმ საკითხზე, რომ ეროვნულ გუნდს ცვლილებები სჭირდება.
კვიპროსის ნაკრებში მუშაობის პერიოდში ბატონმა თემურმა გამოავლინა პროფესიონალიზმი, საქმის მიმართ სერიოზულობა და სიყვარული. მადლობა ქართველ სპეციალისტს ყველაფრისთვის, ვუსურვებთ მას წარმატებას", - აცხადებს კვიპროსელი ფუნქციონერი.
შეგახსენებთ, რომ საქართველოს ნაკრების ყოფილი მწვრთნელი "თეთრ-ლურჯებში" მუშაობდა 2022 წლის ივნისიდან და ამ დროის განმავლობაში გუნდმა მხოლოდ 2 ოფიციალური მატჩი მოიგო. განსაკუთრებით მძიმე "კუნძულელებისთვის" გამოდგა ევრო 2024-ის შესარჩევი, რომელშიც წააგეს 8/8 თამაში, მათ შორის 2 "ჯვაროსნებთან".