"წითლების" მწვრთნელის ნომერ პირველი სამიზნე იყო ედვინ ვან დერ სარი, თუმცა მხოლოდ მეკარის გადმობირებით ის შემოფარგვლას არ აპირებდა. აღნიშნულ მატჩში "თეთრ-წითლების" შემადგენლობაში თამაშობდა შოთა არველაძეც, რომელიც იმ მომენტში გარკვეული მიზეზების გამო, კარიერულ დაღმასვლას განიცდიდა.
შთამბეჭდავი სადებიუტო სეზონის შემდეგ (44 შეხვედრა, 37 გოლი), ქართველმა თავდამსხმელმა 1998 წლის შემოდგომაზე მიიღო მუხლის ტრავმა, რის გამოც სეზონის მნიშვნელოვანი ნაწილიც გამოტოვა. იოჰან კრუიფის სახელობის არენაზე მოთამაშე ფორვარდმა საკმაოდ დიდი დრო მოანდომა ფორმაში ჩადგომას და საუკეთესო კონდიციებში ის არც "არწივებთან" მატჩში იყო.
იან ვოუტერსის გუნდის 24-ე ნომერს იმ შეხვედრაში არ გაუტანია და ზოგადადაც, მერსისაიდული გუნდის მწვრთნელებზე წარუშლელი შთაბეჭდილება ვერავინ მოახდინა. ვარაუდის დონეზე შეგვიძლია დავსვათ კითხვა, რა მოხდებდა იმ შემთხვევაში, თუ "სქაუზერების" დამრიგებლის თვალწინ აღმოჩნდებოდა არა ტრავმირებული, არამედ ფორმის პიკში მყოფი არველაძე?!
სამწუხაროდ, ამას ვერასდროს გავიგებთ. რაც შეეხება ნიდერლანდელი მეკარის ტრანსფერს, ენფილდელები მან გაისტუმრა უარით და ტურინის იუვენტუსი აირჩია. ულიეს დიდხანს არ უფიქრია და აიაქსის იმდროინდელი გოლკიპერის ნაცვლად, მან გადმოიბირა იმ მატჩის მონაწილე სხვა კარის დარაჯი: სანდერ ვესტერველდი.
