LaGazzetta.ge-სთან ექსკლუზიურ ინტერვიუში, 2024 წლის პარიზის ოლიმპიურ თამაშებზე ძიუდოისტების გამოსვლა საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა შეაფასა.
"გუნდური შეჯიბრისგან განსხვავებით, ინდივიდუალურში კარგი შედეგი ვაჩვენეთ, სამი ფინალისტი გვყავდა და სამი მედალი ავიღეთ. ლაშა ბექაურმა მოიპოვა ოქროს მედალი და საქართველოს ძიუდოს ისტორიაში ოლიმპიადის პირველი ორგზის ჩემპიონი გახდა."
"ტატო გრიგალაშვილი სამგზის მსოფლიო ჩემპიონია და მისგან მეტს მოველოდით. ის 81 კგ. წონითი კატეგორიის ლიდერია და გვქონდა განცდა, რომ აუცილებლად ოქროს მედალს მოიპოვებდა. კიდევ ერთხელ დავრწმუნდით, რომ ოლიმპიური თამაშები ევროპისა და მსოფლიო ჩემპიონატისგან განსხვავებული შეჯიბრია და ის იმარჯვებს, ვინც ფსიქოლოგიურად მზად არის. რა თქმა უნდა, ვერცხლიც წარმატებაა, თუმცა, იქიდან გამომდინარე, რომ მან სამჯერ მოიგო მსოფლიო, სხვა მოლოდინები გვქონდა."
"ილია სულამანიძემ ახალგაზრდულ ასაკში ძალიან დიდ წარმატებას მიაღწია და ფინალის მოგებასთანაც ახლოს იყო, თუმცა, რამდენიმე წამით ადრე გაფრთხილებით წააგო. რა თქმა უნდა, ჩვენ გვაქვს შინაგანი პროტესტი, მაგრამ ვერაფერს ვიზამთ, რადგან ეს არის ძიუდოს წესები."
"მიუხედავად იმისა, რომ უფრო დიდი მოლოდინები გვქონდა, საერთო ჯამში, კარგი გამოსვლა ჰქონდათ ძიუდოისტებს — მინდა გაწეული შრომისთვის მადლობა გადავუხადო ძიუდოს ფედერაციას და მედლები მივულოცო გულშემატკივრებს. ჯერ კიდევ ყველაფერი წინ არის და სპორტის დარჩენილ სახეობებშიც ველოდებით მედლებს."
შეგახსენებთ, რომ 2024 წლის პარიზის ოლიმპიადაზე ოქროს მედალი ლაშა ბექაურმა მოიპოვა და ორგზის ოლიმპიური ჩემპიონი გახდა. ტატო გრიგალაშვილი და ილია სულამანიძე კი ვერცხლის მედლებს დაეუფლნენ.
