მსოფლიო ჩემპიონატის დაწყებამდე სულ რამდენიმე კვირით ადრე, ლიონელ მესის ჯანმრთელობის მდგომარეობამ არგენტინელი გულშემატკივრები სულ ცოტათი შეაშინა. ინტერ მაიამის ლიდერმა MLS-ის ბოლო ტურში, ფილადელფია იუნიონთან გამართულ შეხვედრაში მოედანი 73-ე წუთზე ტრავმის გამო დატოვა — ფეხბურთელი ფეხის უკანა ნაწილზე დისკომფორტს გრძნობდა და შეცვლა თავად მოითხოვა.
მატჩის შემდეგ ინტერ მაიამიმ ოფიციალური განცხადება გაავრცელა, რომლის მიხედვითაც გაირკვა, რომ მესის მარცხენა ბარძაყის კუნთზე გარკვეული პრობლემები აღმოაჩნდა. კლუბის ინფორმაციით, არგენტინელის დაბრუნების ზუსტი ვადა ჯერ უცნობია და ყველაფერი მის ფიზიკურ პროგრესზე იქნება დამოკიდებული. მიუხედავად ამისა, გუნდის დროებითმა მთავარმა მწვრთნელმა გილიერმო ოიოსმა პრესკონფერენციაზე სიტუაციის სიმძიმე შედარებით შეამსუბუქა.
38 წლის ლეგენდარული თავდამსხმელი არგენტინის ნაკრებისთვის კვლავ უმნიშვნელოვანეს ფიგურად რჩება. მოქმედ მსოფლიო ჩემპიონებს ჯგუფში ალჟირი, ავსტრია და იორდანია ჰყავთ, ხოლო პირველი შეხვედრა 16 ივნისს ალჟირის წინააღმდეგ გაიმართება. მესისთან დაახლოებულ წყაროებს თუ დავუჯერებთ, არგენტინელი ფეხბურთელის ტრავმა მძიმე არაა და მის მუნდიალზე ასპარეზობას საფრთხე არ ემუქრება.
