დღე არ გავა ისე, რომ უმარ ნურმაგომედოვმა მერაბ დვალიშვილის შესახებ საჯაროდ არ ისაუბროს. მან სუპერმსუბუქი წონითი დივიზიონის ქართველ ჩემპიონს მოუფიქრა ახალი მეტსახელი და ამის გარდა, დაღესტნელმა მებრძოლმა აღნიშნა, მათი მტრობა არასდროს დასრულდება.
"ვფიქრობ, რომ ჩვენი მტრობა არასდროს დამთავრდება. არ დავუმეგობრდები დვალიშვილს და არასდროს დავპატიჟებ მას სადმე ჩაის დასალევად. ეს ვერასდროს მოხდება. ბევრ სისულელეს ლაპარაკობს, რაღაც სიგიჟეებს აკეთებს. ახლაც ჩემს მენეჯერ რიზვანზე ისაუბრა, გველი უწოდა, თუ რაღაც მსგავსი.
ცდილობდა, რომ ჩვენს კონფლიქტში სხვა ბიჭები, ჩემი მეგობრები ჩაეთრია, ვინც მერაბთან სასაუბროდ მივიდნენ. მოიმიზეზა, თითქოს ვიღაცამ ხელი მოჰკიდა. არავინ შეხებია, ყველაფერი ვიდეოზეა გადაღებული. რატომ იტყუები? არაუშავს, ყველაფერს გავარკვევთ. ადამიანებს ჰგონიათ, სულ დვალიშვილზე ვსაუბრობ.
მერაბის შესახებ ლაპარაკი არ მჭირდება, როცა მასზე მეკითხებიან, ვპასუხობ.მე სიტუაციას ასე ვხედავ - თუ ვინმესთან პრობლემა გაქვს, კამერა არ გჭირდება, არც სოციალური ქსელი, არავინ გჭირდება. უპატივცემულობა გამოვიჩინე? ჩემთან მოდი. ტირილს რატომ იწყებ? თუ პრობლემა გაქვს, მოდი, პირისპირ დამიდექი და მითხარი ყველაფერი, რაც გინდა.
დიახ, შემიძლია ვთქვა, რომ დვალიშვილი კარგი მებრძოლია, თუმცა სხვა მხრივ - როგორ იქცევა, როგორ მოძრაობს, რამდენად ზრდილობიანია თუ უპატივცემულო, ეს ჩემი საქმე არაა. არც მერაბის მასწავლებელი ვარ, არც ბიძამისი, არც ის, რომელიც ეტყვის, სწორად იქცევა თუ არასწორად. ეს მე არ მეხება.
თუ თვლი, რომ შენს მიმართ უპატივცემულობა გამოვიჩინე, პირდაპირ ჩემთან მოდი. არავინ გაკავებს. შეგიძლია ჩემი ნომერი იპოვო, მომწერე. დვალიშვილის შემდეგი ჩხუბი აბუ-დაბიშია, შემიძლია იქ ჩავიდე, უბრალოდ მომწეროს. ესაა მამაკაცის საქციელი და არა უპატივცემულობაზე ტირილი.
დროა, მეტსახელი შეიცვალოს. აღარ არის “მანქანა”, დროა, მერაბმა "უპატივცემულობა” დაირქვას, იმიტომ, რომ გამუდმებით ამის თაობაზე ტირის", - განაცხადა რუსმა მებრძოლმა ქართველ კონკურენტზე.
