პარის სენ-ჟერმენი V მანჩესტერ სიტი
შეხვედრა, რომელშიც შეცდომის დაშვების უფლება არცერთ გუნდს არ აქვს. მან სიტი რვა ქულით არის 22-ე ადგილზე, პარის სენ-ჟერმენი კი საერთოდ 24-ეულს მიღმაა: 7 ქულა, 25-ე პოზიციაზე. მანჩესტერელებთან წაგების შემთხვევაში პსჟ-ს ჩემპიონთა ლიგის პლეი-ოფში გასვლის შანსები პრაქტიკულად მიზერული იქნება.
შეგახსენებთ, რომ პარიზულ გუნდს ვერ დაეხმარება ხვიჩა კვარაცხელია, რომლის დარეგისტრირების უფლება კლუბს ჯერჯერობით არ აქვს. განაცხადში ახალი მოთამაშის შეყვანა შესაძლებელი იქნება მხოლოდ იმ შემთხვევაში, თუ "ლურჯ-წითლები" პლეიოფში გავლენ. ამისთვის კი "ქალაქელებსა" და შტუტგარტთან მოგება არის საჭირო.
"ლურჯებს" დღევანდელ შეხვედრაში ვერ დაეხმარებიან როდრი ერნანდესი, ჯონ სტოუნსი, ნათან აკე და ოსკარ ბობი. ლუის ენრიკეს გუნდს კი იბრაჰიმ მბაიე ვერ დაეხმარება. ეს იქნება რიგით მე-8 მატჩი პეპ გუარდიოლას გუნდსა და პარკ დე პრენსის ბინადრებს შორის. აქამდე 4 თამაში დასრულდა ეტიჰადელთა მოგებით, მხოლოდ ერთხელ იმარჯვა პარის სენ-ჟერმენმა, 2 მატჩი კი ფრედ დასრულდა.
ცალკე გამოსარჩევია მწვრთნელების დუელი. ესპანელები საფეხბურთო კარიერის დროს დიდი ხნის მანძილზე იყვნენ თანაგუნდელები, როგორც ბარსელონაში, ისე ეროვნულ გუნდშიც. მათ ანგარიშზე 148 მატჩია. შეგახსენებთ იმასაც, რომ სამწვრთნელო კარიერის დაწყების შემდეგ, ორივე მათგანმა "ბლაუგრანას" ტრებლი მოაგებინა.
ჩემპიონთა ლიგის ოთხშაბათის ყველა მატჩი:
21:45 - ლაიფციგი-სპორტინგი
21:45 - შახტარი-ბრესტი
23:55 - პსჟ-მანჩესტერ სიტი
23:55 - ფეიენოორდი-ბაიერნი
23:55 - რეალი-ზალცბურგი
23:55 - მილანი-ჟირონა
23:55 - სპარტა-ინტერი
23:55 - არსენალი-დინამო ზაგრები
23:55 - სელტიკი-იანგ ბოიზი
