ჩემპიონთა ლიგა დაბრუნდა. დღეს გაიმართება ლიგის ფაზის მეხუთე ტურის ცხრა მატჩი, მათ შორის ცენტრალურ დაპირისპირებად გამოვყავით ბარსელონას სტუმრობა ლონდონში, ჩელსისთან.
ჩელსი V ბარსელონა
ჩემპიონთა ლიგის ფაზაში ოთხი ტურის შემდეგ, ბარსელონა და ჩელსი არიან მეზობლად, შვიდ - შვიდი ქულით, მე-11 - მე-12 ადგილებზე. ქულების იგივე რაოდენობა აქვთ ასევე დორტმუნდს, ატალანტას, სპორტინგსა და ყარაბაღს. რაც შეეხება კატალონიელებისა და ლონდონელთა განვლილ გზას აქამდე, ორივეს ანგარიშზეა 2 მოგება, 1 ფრე და 1 წაგება.
"ბლაუგრანამ" დაამარცხა ნიუკასლ იუნაიტედი და ოლიმპიაკოსი, ფრე ითამაშა ბრიუგესთან, მარცხი იგემა პარის სენ-ჟერმენთან. "არისტოკრატები: მოგება აიაქსსა და ბენფიკასთან, ფრე ყარაბაღთან და წაგება ბაიერნთან. რაც შეეხება დღევანდელი შეხვედრის ისტორიულ კონტექსტს, ეს იქნება კამპ ნოუს ბინადრებისა და ჩელსის რიგით მე-18 დუელი.
ექვსჯერ იმარჯვა ბარსელონამ, ხუთჯერ - ლონდონელებმა, ექვსი მატჩიც ფრედ დასრულდა. ურთიერთდაპირისპირებების ისტორიაში გვხვდება ერთაბაშად 5 მოთამაშე, რომელმაც ამ დუელში შეაგდო 3 ბურთი: ტორე ანდრე ფლო, რონალდინიო გაუჩო, დიდიე დროგბა, ფრენკ ლამპარდი და ლიონელ მესი.
ჩემპიონთა ლიგის სამშაბათის მატჩის დღე
| აიაქსი - ბენფიკა | 21:55 |
| გალათასარაი - სენტ-ჟილი | 21:55 |
| ჩელსი - ბარსელონა | 23:55 |
| მანჩესტერ სიტი - ლევერკუზენი | 23:55 |
| ბოდო გლიმტი - იუვენტუსი | 23:55 |
| დორტმუნდი - ვილიარეალი | 23:55 |
| მარსელი - ნიუკასლი | 23:55 |
| ნაპოლი - ყარაბაღი | 23:55 |
| სლავია - ბილბაო | 23:55 |
