2013 წლის აგვისტო - იმ დროს ჯერ კიდევ უცნობმა კონორ მაკგრეგორმა გამართა რიგით მეორე ბრძოლა UFC-ში, მეტოქესთან, ვინც ასევე იყო თავისი კარიერის სტარტზე. საუბარია მაქს ჰოლოუეიზე, რომელიც მსოფლიოს მთავარ პრომოუშენში მე-6 ჩხუბს ატარებდა. ორივე ქვემსუბუქწონოსნის მხრიდან შთამბეჭდავი პერფომანსის შედეგად მსაჯებმა მოგება ერთსულოვანი გადაწყვეტილებით ირლანდიელს მისცეს.
ასე დაიწყო UFC-ში "ნოტორიუსის" შთამბეჭდავი გზა, რომელიც გრძელდება დღემდე, სპორტიდან ხუთწლიანი შორს ყოფნის მიუხედავადაც კი. ის ახლაც რჩება შერეული საბრძოლო ხელოვნებების ისტორიაში ყველაზე გავლენიან ფიგურად და ამაზე მეტყველებს ის ფაქტი, თუ რამხელა აჟიოტაჟი გამოიწვია 37 წლის მებრძოლის დაგეგმილმა დაბრუნებამ.
ადამიანი, რომელმაც MMA შეცვალა
გამორჩეული მებრძოლები MMA-ს ჰყოლია მაკგრეგორამდეც, მასზე ლეგენდარულებიც კი. რენდი კუტიური, ანდერსონ სილვა, ჟორჟ სენ-პიერი და სხვები, მსოფლიოს მთავარი პრომოუშენის კედლებს გარეთ შერეული საბრძოლო ხელოვნებების სამყაროს აზანზარებდნენ ფიოდორ ემელიანენკო, მირკო ფილიპოვიჩი და ა.შ.
თითოეული მათგანი არის MMA-ს დამსახურებული ლეგენდა, თუმცა ისეთი ჰაიპი და რეზონანსი, როგორიც აქვს ირლანდიელ მებრძოლს, მათ არასდროს ჰქონიათ. კონორი არის შერეული საბრძოლო ხელოვნებების პირველი დიდი სუპერვარსკვლავი, რომელიც გავლენითა და პოპულარობით სპორტის სხვა სახეობის ვარსკვლავებსაც გაუტოლდა.
"ნოტორიუსი" არ არის მხოლოდ მებრძოლი - ის არის ნამდვილი კულტურული ფენომენი, ვინც MMA ვიწრო, სპორტული წრიდან გლობალურ, მულტიმილიონიან შოუ ბიზნესად აქცია. მანამდე შერეული საბრძოლო ხელოვნებები იდგა სხვა რელსებზე, მაკის შემდეგ კი თამაშის წესები სამუდამოდ შეიცვალა.
მის გამოჩენამდე იყვნენ მებრძოლები, ვინც მეტოქეებს სიტყვიერად უპირისპირდებოდნენ, მაგალითად, ჩეილ სონენი, თუმცა ირლანდიელმა ყოფილმა ჩემპიონმა ეს ხელოვნების დონეზე აიყვანა. კონორის პრესკონფერენციები დამოუკიდებელ შოუდ იქცა. ის უბრალოდ კი არ ლანძღავდა ოპონენტებს, არამედ ზუსტად მათ სუსტ წერტილებს ითვლიდა.
რაც მთავარია, "ნოტორიუსი" აშკარად ერთობოდა ამ პროცესით და ხშირად ბრძოლამდე ბევრად ადრე უნადგურებდა მათ ფსიქიკას. მისი ცნობილი ფრაზები, მაგალითად, "Who the f**k is that guy?" ან "I'd like to apologize to absolutely nobody" პოპულარული კულტურის ნაწილი გახდა. შერეული საბრძოლო ხელოვნებების სამყარო 37 წლის სპორტსმენის გამონათქვამების გარეშე უბრალოდ წარმოუდგენელია.
სხვა მნიშვნელოვანი დეტალი - მაკგრეგორმა დაამსხვრია მითი იმის შესახებ, რომ მებრძოლს მხოლოდ UFC-ის მიერ შეთავაზებული პირობები უნდა მიეღო. ირლანდიელმა ექს-ჩემპიონმა შექმნა ტერმინი "Red Panty Night", რაც იმას ნიშნავდა, რომ მასთან ჩხუბი ნებისმიერი ოპონენტისთვის კარიერაში ყველაზე დიდ ჰონორარს და ცხოვრების შეცვლას ნიშნავდა.
Pay-Per-View რეკორდები - UFC-ის ისტორიაში ექვსი ყველაზე გაყიდვადი ტრანსლაციიდან ხუთში მთავარი გმირი სწორედ კონორია. კროსოვერ ჩხუბები: "ნოტორიუსმა" შეძლო შეუძლებელი, შერეულ საბრძოლო ხელოვნებებში მოღვაწე სპორტსმენმა კრივის ლეგენდასთან, ფლოიდ მეივეზერთან გამართა ორთაბრძოლა, რამაც მას ასეულობით მილიონი დოლარი მოუტანა და სპორტის სახეობებს შორის საზღვრები წაშალა.
მაკგრეგორამდე ერთდროულად ორი წონის ქამრის ფლობა პრაქტიკულად წარმოუდგენელი იყო - UFC-ის ეს არ მოსწონდა, რადგან დივიზიონები "იყინებოდა". ირლანდიელმა ჟოზე ალდოსა და ედი ალვარესთან მოგებით ერთდროულად 2 წონაში მოიპოვა ქამარი, რითაც გზა მომავალ ორმაგ ჩემპიონებსაც გაუხსნა.
კონორმა შეცვალა მებრძოლის იმიჯი. სპორტული ფორმები და სავარჯიშო აღჭურვილობა ძვირადღირებულმა, სპეციალურად შეკერილმა კოსტიუმებმა, საათებმა და მოდურმა იერმა შეცვალა. "ნოტორიუსმა" დაამტკიცა, შერეული საბრძოლო ხელოვნებების სპორტსმენი შეიძლება ა-კლასის გლობალური ვარსკვლავი იყოს.
ეს ფაქტი Forbes-ის ყველაზე მაღალანაზღაურებადი სპორტსმენების სიამაც დაადასტურა. ამასთანავე, საკუთარი ბრენდების, მაგალითად, Proper No. Twelve-ის შექმნით მაკმა აჩვენა სხვა მებრძოლებს, როგორ უნდა აქციონ საკუთარი სახელი ბიზნეს იმპერიად. ბოლოს კი მთავარი: მან ასწავლა სხვა მებრძოლებს, თუ როგორ გაყიდონ საკუთარი თავი.
ირლანდიელმა ყოფილმა ჩემპიონმა MMA სპორტული დარბაზებიდან დიდ ეკრანებზე, პოპ-კულტურასა და გლობალურ მედიაში გადაიტანა. მიუხედავად მისი კარიერის შემდგომი სირთულეებისა, შერეული საბრძოლო ხელოვნება დღეს ისეთია, როგორიც არის, დიდწილად სწორედ "კონორის ეფექტის" დამსახურებით.
გავლენა სხვა მებრძოლებზე
სწორედ ეს არის მაკგრეგორის ყველაზე დიდი მემკვიდრეობა - მან შექმნა ახალი თაობის მებრძოლების ე.წ. "ბლუპრინტი". დღეს სპორტსმენებმა უკვე იციან, რომ მხოლოდ დარბაზში ჩაკეტვა და ჩუმად ვარჯიში აღარ კმარა: თუ გინდა დიდი ფული და აღიარება, მედიასთან მუშაობა და საკუთარი თავის ბრენდირება უნდა ისწავლო.
ილია თოფურია და სხვა თანამედროვე ვარსკვლავები ამას შესანიშნავად იყენებენ, თუმცა თითოეულს თავისი ხელწერა აქვს. ფსიქოლოგიური ზეწოლის ელემენტები ირლანდიელი ექს-ჩემპიონის მეთოდია, მაგრამ ქართველმა მებრძოლმა ეს უფრო ინტელიგენტურ, მაგრამ ამავდროულად ცივსისხლიან სტილში გააკეთა.
გამარჯვების პროგნოზირება და აღნიშნვა, ასევე პრესკონფერენციაზე ქამრის წართმევა ალექსანდერ ვოლკანოვსკისთვის, ისე როგორც ეს კონორმა ალდოსთან გააკეთა. "მატადორი" პრესკონფერენციებზე ყოველთვის იდეალურად მორგებული კოსტიუმებითა და ძვირადღირებული აქსესუარებით ჩნდება, ოქტაგონს მიღმა კი "ნოტორიუსის" მსგავსად, საკუთარ ბიზნესს ავითარებს, რადგან მას ესმის, მებრძოლის კარიერა ხანმოკლეა.
კიდევ ერთი ვარსკვლავური მებრძოლი, ვისთვისაც მაკგრეგორი არის ინსპირაციის წყარო, შონ ო'მალია. მან თავად აღიარა, რომ ორი დივიზიონის ირლანდიელი ექს-ჩემპიონის ჩხუბების ყურებამ ასწავლა, როგორ უნდა გახდე ვარსკვლავი. ამერიკელმა სუპერმსუბუქწონოსანმა აქცენტი გააკეთა ექსტრავაგანტულ ვიზუალზე, მაგრამ კონორის მსგავსად, სიტყვებს ის საქმით ამყარებს.
"შუგას" სტრაიკინგი და სნაიპერული ნოკაუტები ახალგაზრდა "ნოტორიუსს" ძალიან ჰგავს. კიდევ ერთი ირლანდიელი, ვინც პირდაპირ ამბობს, რომ შერეულ საბრძოლო ხელოვნებებში მხოლოდ იმიტომ მოვიდა, რომ მოზარდობისას მაკის ტრიუმფს უყურებდა, იან მაჩადო გარია. მას უკვე უწოდებენ კონორის მემკვიდრეს 77 კგ წონით დივიზიონში.
პარადოქსია, თუმცა ირლანდიელმა ყოფილმა ჩემპიონმა ხაბიბ ნურმაგომედოვიც გლობალურ სუპერვარსკვლავად აქცია. "ბოროტი და ამორალური პერსონაჟის" ფონზე, დაღესტნელმა მსუბუქწონოსანმა შექმნა სრულიად საპირისპირო იმიჯი: დისციპლინირებული, რელიგიური, ოჯახზე ორიენტირებული თავმდაბალი მებრძოლი, რომლისთვისაც მთავარი, სპორტული პატიოსნებაა.
ამ ორმა პოლუსმა შექმნა UFC 229 - ისტორიაში ყველაზე გაყიდვადი ივენთი. დღეს ისლამ მახაჩევიც ამავე ხაზს მიჰყვება, საპირისპირო მხარეს კი არიან "ნოტორიუსის" გავლენის ქვეშ მოქცეული მებრძოლები: თოფურია და გარი. დაღესტნელ ჩემპიონს ერთ მათგანთან ჩაეშალა ჩხუბი, მეორესთან დუელი კი ამ ზაფხულს მაინც მოუწევს.
დაბრუნება დიდ სცენაზე
მაკგრეგორისა და ჰოლოუეის რევანში (პირველი ბრძოლიდან 13 წლის შემდეგ!) ერთ-ერთი ყველაზე დრამატული და დამაინტრიგებელი დაპირისპირებაა. 2013-ში, როცა ისინი ჯერ კიდევ დამწყები მებრძოლები იყვნენ, ირლანდიელმა ქვემსუბუქწონოსანმა მსაჯების ერთსულოვანი გადაწყვეტილებით მოიგო.
დღეს ორივე სრულიად სხვა სპორტსმენია, შესაბამისად, ამ დუელისგან ახალ ისტორიას უნდა ველოდოთ. ჰავაელი არის მებრძოლი, ვინც ყოველთვის ფორმაშია, აქტიურად ჩხუბობს და ტოპშია, 34 წლის ასაკში, 35-ზე მეტი ბრძოლის შემდეგაც. ირლანდიელი ექს-ჩემპიონი უკანასკნელ წლებში უფრო ოქტაგონს მიღმა ცხოვრებას უთმობდა დროს.
კონორისთვის ეს ბრძოლა არის შესაძლებლობა, დაამტკიცოს, რომ ისევ ელიტური სპორტსმენია და არა უბრალოდ "წარსულის ვარსკვლავი". რაც შეეხება აღნიშნული ჩხუბის სპორტულ ფასეულობას, მაქსთან მიმართებაში კითხვები არაა, "ნოტორიუსთან" კი უამრავი, მთავარი ჟღერს ასე: ეს მართლაც სრულფასოვანი ქამბექია თუ უბრალოდ კომერციული ნაბიჯი კარიერის მიწურულს? პასუხებს მივიღებთ 12 ივლისს, გამთენიისას.
