საქართველოსა და ალბანეთის ნაკრებების მატჩის წინ კომენტარი ჩვენი ნაკრების მთავარმა მწვრთნელმა, ვილი სანიოლმა გააკეთა და სხვადასხვა საკითხზე ისაუბრა.
ალბანეთი ძალიან კარგი ნაკრებია და ეს უკრაინასთან მატჩშიც გამოჩნდა. ვიცი, რომ თამაში ხვალ სავსე სტადიონზე მოგვიწევს და რთული შეხვედრა გველის. შეიძლება იმ მატჩში უკრაინას უპირატესობა ჰქონდა, თუმცა შედეგი სახეზეა. 2 წლის წინ ამხანაგური მატჩი ალბანეთთან წავაგეთ. იმის შემდეგ გავიზარდეთ, განვვითარდით და ვნახოთ, რა მოხდება ხვალ.
ფიზიკურ მომზადებაზე
ჩეხეთთან 4:1 მოვიგეთ, მაგრამ ადვილი მატჩი არ ყოფილა. ფეხბურთელებმა ბრწყინვალე შეხვედრა ჩაატარეს, თუმცა ამას საკმაოდ დიდი ენერგია დასჭირდა.
პენალტის დამტყმელებზე
ჩვენ გვყავს მოთამაშეები, რომლებიც პენალტებს კარგად ასრულებენ. კვარა, ჟორჟი, გველესიანი. ამ კომპონენტში ბევრს ვმუშაობთ.
ჩაკვე-კვარას თაობაზე
ჩეხეთთან მატჩში მივიღეთ გადაწყვეტილება, ჩაკვეტაძეს მარცნივ ეთამაშა კვარასთან ერთად. თუ სად ითამაშებს ჩაკვე, ეს მეტოქეზეა დამოკიდებული, ევროპის ჩემპიონატზე მარჯვნიდან თამაშობდა. ფაქტი ისაა, რომ ჩაკვე ბრწყინვალე ფეხბურთელია და ყველგან შეუძლია თამაში.
ცვლილებები შემადგენლობაში
იქნება თუ არა ცვლილებები? - ერთს ვიტყვი, რომ ყოველი მატჩი განსხვავებულია. ყოველი მატჩისთვის სხვადასხვაგვარად ვემზადებით და ხვალ ვნახავთ, ვინ მოირგებს საქართველოს ნაკრების მაისურს. მარცხენა მცველის პოზიციაზე ლოჩოშვილმა კარგი მატჩი ჩაატარა და ამაზე ვერაფერს ვიტყვი.
