ჯენარო გატუზომ გაუკეთა სოლიდური საჩუქარი სპლიტის ჰაიდუკის ფეხბურთელებსა და კლუბის პერსონალს. პრინციპული მოწინააღმდეგესთან, ზაგრების დინამოსთან მოგების შემდეგ, იტალიელმა დამრიგებელმა "თეთრების" თითოეულ წევრს ახალი iPhone 16 აჩუქა. სპეციალისტს აღნიშნული საჩუქარი 40 000 დაუჯდა.
ერთი ცალი სმარტფონის საბაზრო ღირებულება დაახლოებით 1100 ევროა, "ზღვისპირელების" მწვრთნელმა ასეთი 35 იყიდა. აღსანიშნავია ის ფაქტი, რომ "რინო" საჩუქრის გაკეთებას გეგმავდა უფრო ადრეც, მაგრამ თავისი გუნდის მიერ დაფიქსირებული არადამაკმაყოფილებელი შედეგების გამო, ის ამ ნაბიჯს არ დგამდა.
აქვე დავამატებთ, რომ სეზონის დაწყების წინ, 46 წლის მწვრთნელი ეჩხუბა პოლიუდზე დაბრუნებულ ივან პერიშიჩს, რის შემდეგაც ვეტერან გარემარბს კლუბის დატოვება მოუწია. კონფლიქტის მიზეზი: გატუზოს არ მოსწონდა ის ფაქტი, რომ ხორვატი ვინგერი მუდმივად აკრიტიკებდა თანაგუნდელებს ცუდი ფორმის გამო.
ჰაიდუკმა გაუწყვიტა კონტრაქტი მილანის ინტერის ყოფილ გარემარბს და კომპენსაციის სახით მას 200 ათასი ევრო გადასცა. ცნობისთვის, ვეტერანი ვინგერი დღემდე თავისუფალი აგენტია. გასულ ზაფხულს სპლიტში დაბრუნდა ივან რაკიტიჩიც, მაგრამ მან, 35 წლის ვინგერისგან განსხვავებით, იტალიელ დამრიგებელთან საერთო ენის გამონახვა შეძლო.
