ისტორიული დღე პარიზისთვის და ისტორიული დღე საქართველოსთვის - დღეს, პსჟ-ს შანსი აქვს ისტორია დაწეროს და ჩემპიონთა ლიგა ზედიზედ მეორედ მოიგოს, შესაბამისად, ეს ფაქტი ისტორიული იქნება მთელი საქართველოსთვის, რადგან ხვიჩა კვარაცხელია ჩემპიონთა თასს ზედიზედ მეორედ აღმართავს.
ბუდაპეშტში ყველაფერი უმაღლეს დონეზეა ორგანიზებული. აეროპორტში შესვლისთანავე იგრძნობა, თუ რა დონის მატჩს მასპინძლობს ეს ქალაქი. რაც არ უნდა გასაკვირი იყოს, ბუდაპეშტის ქუჩებში 3-ჯერ მეტი არსენალის გულშემატკივარია და ისინი უფრო აქტიურები არიან. ალბათ, ამის მიზეზიც აქვთ - მათ გუნდს ხომ ჩემპიონთა ლიგა ჯერ არასდროს მოუგია. ჩემპიონთა ლიგის ფან ზონაში მოწყობილ სივრცეში არსენალის მაისურებით მოსიარულე გულშემატკივრები აშკარად ჭარბობენ.
დღის განმავლობაში, გულშემატკივებს საშუალება აქვთ სხვადასხვა აქტივობებით დაკავდნენ, გადაიღონ ფორო ჩემპიონთა ლიგის თასთან, შეეჯიბრონ ერთმანეთს სხვადასხვა თამაშებში და შეიქმნან მატჩისწინა განწყობა ქუჩებში ქართველ გულშემატკივრებსაც ვხვდებით, არიან ფრანგი გულშემატკივრებიც, რომელთა უმრავლესობას კვარაცხელიას მაისური აცვია.
მატჩისწინა ვარჯიში საკმაოდ საინტერესო გამოდგა. პსჟ-ს და არსენალის ვარჯიშები ერთმანეთისგან სრულიად განსხვავებული იყო. იდეაში, რასაც მოედანზე ვხედავთ, ის ხდებოდა ვარჯიშზე - პსჟ-მ თავიი განკუთვნილი 1 საათი მთლიანად ბურთთან ერთად ვარჯიშს, კომბინაციებსა და დარტყმებს დაუთმო, არსენალმა კი 1 საათი ფიზიკურად მომზადებაში და გასართობ ვარჯიშებში გამოიყენა.
ვარჯიშის წინ, მიკელ არტეტამ ფეხბურთელები შემოკრიბა და სიტყვით მიმართა, შემდეგ კი უშუალოდ იყო ჩართული ყველაფერში და თავის მოთამაშეებთან ერთად "კვადრატიც" კი ითამაშა, რათა კარგი განწყობა შეექმნა. ლუის ენრიკეს ფეხბურთელებთან ბევრი არ უსაუბრია. ალბათ, თვლის, რომ მისმა ფეხბურთელებმა ისედაც კარგად იციან ყველაფერი და მართლაც ასეა - გამართული სისტემა და ზუსტად იგივე შემადგენლობა, რაც გასული წლის ფინალში.
თვალსაჩინო იყო, რომ ვარჯიშის ბოლოს, დარტყმები არსენალის ფეხბურთელებმა ბევრად დიდი სიზუსტით გამოიყენეს, ვიდრე პსჟ-ს მოთამაშეებმა. მათი ყველა დარტყმა მეკარისთვის აუღებელი იყო, რასაც ვერ ვიტყვით პსჟ-ზე. კვარამ ბურთი ძელს 2-ჯერ გაარტყა, 2-ჯერ მეკარემ აუღო. პარიზელთა მხრიდან ყველაზე ზუსტი ვიტინია იყო.
20 საათიდან მთელი ევროპის ყურადღება ბუდაპეშტისკენ იქნება მიმართული, სადაც მთავარი მოქმედი პირი ქართველი იქნება, რომელიც ჩემპიონთა ლიგაზე შეუჩერებელია და ნაკლებ სავარაუდოა, არსენალმა იპოვნოს მისი შეჩერების გასაღები. კვარა სეზონის საუკეთესო ფეხბურთელობასთან ერთ ნაბიჯშია.
