ისლამ მახაჩევმა განაცხადა, რომ მერაბ დვალიშვილს არ გახარებია მისი წარმატება. ყველაფერი დაიწყო მას შემდეგ, რაც ქვესაშუალო წონითი დივიზიონის ქამრის დაღესტნელმა მფლობელმა იან მაჩადო გარის მოუგო. გთავაზობთ ორივე მებრძოლის კომენტარს.
მახაჩევი - "დვალიშვილის რეაქცია ვნახე. ბრძოლას საერთოდ როგორ უყურებდა - თავიდანვე არ იყო ბედნიერი ჩემი წარმატებით, თუმცა ასეთ რაღაცეებს ყურადღებას არ ვაქცევ. იანმა მერაბს მოუგო და რუსეთის დროშაც ააფრიალა, კიდევ ერთხელ მოუგებს და გააჩუმებს", - განაცხადა დაღესტნელმა მებრძოლმა.
დვალიშვილი - "ახლახან ვნახე მახაჩევის ვიდეო, რომელიც გარისთან ბრძოლაზე ჩემს რეაქციას ეხებოდა. ჩემს პირველ ვიდეოში შეგიძლიათ ნახოთ ჩემი ნამდვილი რეაქცია ისლამის ჩხუბის დროს და მის შემდეგ. თავადაც ნახავთ, რომ ბრძოლის შემდეგ მას მოგება მივულოცე. ასევე მივულოცე ჩემს სოციალურ ქსელებში.
მინდა კიდევ ერთხელ განვმარტო - მახაჩევის მიმართ დადებითი დამოკიდებულება მაქვს. ვფიქრობ, რომ ის დიდი და თავმდაბალი ჩემპიონია. პატივს ვცემ იმ შრომას, რაც ისლამმა საკუთარ კარიერაში ჩადო და მის მიმართ მხოლოდ პატივისცემას ვგრძნობ, მაგრამ როდესაც ვნახე, როგორ შემოიტანა მახაჩევის გუნდმა რუსეთის დროშა ოქტაგონში, გავბრაზდი.
პირველ რიგში იმიტომ, რომ UFC-ში ჩატარებული ხუთი სატიტულო ბრძოლიდან, არცერთში მომეცა უფლება, გალიაში ჩემი ქართული ან ამერიკული დროშა შემეტანა. ამ რეაქციის მე-2 მიზეზია ის, რომ ჩემთვის ეს საკითხი ძალიან პირადულია, იმის გამო, რაც რუსეთის პოლიტიკამ და მთავრობამ ჩემს ქვეყანას დაუშავა.
რუსეთს საქართველოს დაახლოებით 20 პროცენტი აქვს ოკუპირებული, ამის გარდა, ჩემი ქართველი ხალხის წინააღმდეგ ომის, ოკუპაციისა და წამების ისტორიაც არსებობს. რუსეთი ასევე პასუხისმგებელია ჩეჩნეთში ძალადობის საშინელ ფაქტებზე, ის დღესაც უკრაინაში ხალხს კლავს. აქვე მინდა ერთი რამ ძალიან მკვეთრად განვაცხადო: მე არ მძულს რუსი ხალხი.
მე მძულს რუსეთის პოლიტიკა და რუსეთის მთავრობა. პრობლემა მაქვს რუსეთის მთავრობასა და მის ქმედებებთან და არა ჩვეულებრივ რუს ხალხთან. ჩემთვის, კავკასიელ ხალხს: დაღესტნის, ჩეჩნეთის, ინგუშეთის და რეგიონის სხვა მხარეების მაცხოვრებლებს აქვთ საკუთარი იდენტობა, კულტურა და ისტორია.
კავკასიელ ხალხს პატივს ვცემ. ასე რომ, კიდევ ერთხელ, ჩემი სიტყვები პირადად ისლამს არ ეხებოდა. ბოლოს კი მინდა ვთქვა, რომ რუსული მედია მუდმივად მისვამს პროვოკაციულ კითხვებს, ისინი ამ ვიდეოსაც სწორად არასდროს თარგმნიან და არ აჩვენებენ იმას, რასაც სინამდვილეში ვამბობ, რადგან ის არ შეესაბამება იმ ნარატივს, რომლის შექმნაც მათ სურთ.
რეალობა კი ისაა, რომ რუსეთის მთავრობა დიქტატორული და კორუმპირებულია. არ არსებობს სიტყვის თავისუფლება და თუ რუსეთში რამეს აპროტესტებ, ციხეში გიშვებენ. ეს არის ფაქტები", - განაცხადა ქართველმა მებრძოლმა.
