ვიდრე იანვარში გიორგი მალანია (63 კგ.) WLF-ის ქამრისთვის იბრძოლებს და გამარჯვების შემთხვევაში, კიკბოქსინგის ყველაზე პრესტიჟულ ორგანიზაციაში, ONE Championship-ში გადასვლის შესაძლებლობა მიეცემა ახალგაზრდა სპორტსმენი კარიერისა და მთავარი მიზნების შესახებ, Lagazzetta.ge-სთან ინტერვიუში საუბრობს
- რამდენიმე დღის წინ ჩინეთში ოთხთა ტურნირზე 2 ბრძოლა მოიგე, რას იტყვი ამ დაპირისპირებებზე, რთული აღმოჩნდა გამარჯვება?
- დიახ, 26 ოქტომბერს, ჩინეთში, ორგანიზაცია WLF-ში 2 ბრძოლა მქონდა. ტურნირის მოსაგებად რა თქმა უნდა, ორივე ბრძოლის მოგება იყო საჭირო. ჩემი მეტოქეები ძალიან გამოცდილები და ყოფილი ჩემპიონები იყვნენ. მათთან დაპირისპირება ჩემთვის ახალი გამოწვევა იყო და კიდევ უფრო დიდი მოტივაცია მომცა მებრძოლა გამარჯვებისთვის.
- იანვარში ქამრისთვის გიწევს ბრძოლა, როგორ ემზადები მნიშვნელოვანი შეხვედრისთვის და ვინ იქნება შენი მეტოქე?
- ამ გამარჯვებით შევძელი სატიტულო ბრძოლის მოპოვება. იანვარში, თარიღი ჯერ არაა დაზუსტებული, კვლავ ოთხთა ტურნირი იქნება, გამარჯვებული ქამარს დაეუფლება, ჩემი პირველი მეტოქე მსოფლიოს TOP რეიტინგში მე-3 ადგილზეა. რა თქმა უნდა, მე განსაკუთრებული მონდომებით ვემზადები და ჩემ მწვრთნელთან, მამუკა შონიასთან ერთად, ყველა კომბინაციაზე ვმუშაობ. მიუხედავად იმისა, რომ ჯერ 20 წლის ვარ, ჩემ კარიერაში ერთ-ერთი მთავარი მიზანი სწორედ ამ ქამრის მოპოვებაა და ყველაფერს გავაკეთებ გამარჯვებისთვის. მინდა გავხდე პირველი, ვინც ჩვენ ქვეყანაში WLF-ის ქამარს ჩამოიტანს.
- რამდენად შესაძლებელია საქართველოში ვარჯიშით უმაღლეს შედეგს მიაღწიო?
- მე საქართველოში ვვარჯიშობ, 6 წლიდან დავდივარ კიკბოქსინგზე, მებრძოლთა კლუბ დავითიანნში, როგორც აღვნიშნე, ჩემი მწვრთნელი მამუკა შონიაა, რომელიც ძალიან მეხმარება და ყველა ჩემ წარმატებაში, რა თქმა უნდა, განსაკუთრებული წვლილი მიუძღვის. “დავითიანნში” ძალიერი სპორტსმენები ვარჯიშობენ და მათთან სპარინგი ძალიან მნიშვნელოვანია. აქ არიან მსოფლიოსა და ევროპის ჩემპიონები და ერთმანეთს ძალიან ვეხმარებით. ჩვენ ყველას გვინდა, რომ რაც შეიძლება მეტ წარმატებას მივაღწიოთ ჩვენი მთავარი მწვრთნელის, მამუკა შონიას დახმარებით და ბევრი გამარჯვება მოვუტანოთ ჩვენ სამშობლოს.
- შენი მიზანი, ONE Championship-ში მოხვედრაა, ქამრის მოგების შემთხვევაში პრესტიჟულ ორგანიზაციაში მოხვდრის რა შესაძლებლობა გექნება?
- ვთვლი, რომ ერთი ნაბიჯი მაკლია ჩემს მიზნამდე და ოცნებამდე, ეს არის ის ქამარი რომლისთვისაც ვიბრძოლებ იანვარში, მოგების შემთხვევაში ეს ყველაფერი რეალური იქნება, მე ამის მჯერა.
