იაგელონიასთან წაგებული 1:2 მატჩის შემდეგ კომენტარი იბერიას ფეხბურთელებმა ნიკა სიხარულაშვილმა და ზვიად ნაჭყებიან გააკეთეს.
ნიკა სიხარულაშვილი: "იმ ანგარიშის შემდეგ, რაც აქ ჩამოვიტანეთ, რთული იყო, ოდნავ საბრძოლო ანგარიში რომ ყოფილიყო, აქ ყველაფერი სხვანაირად იქნებოდა. ძალიან კარგია, რომ კონფერენს ლიგაზე ვითამაშებთ, ჯერ ჩემპიონატისთვის მოვემზადებით, შემდეგ სრული კონცენტრაცია კონფერენს ლიგაზე იქნება. მიზანი შემდეგ ეტაპზე გასვლა იქნება. იაგელონიასთან ორმატჩიანი დაპირისპირება ძალიან დაგვეხმარა, რათა ხარისხობრივად გავზრდილიყავით. ძლიერ გუნდებთან ბრძოლაც შეგვიძლია."
ზვიად ნაჭყებია: "შედეგი არადამაკმაყოფილებელია, მაგრამ კონფერენს ლიგა განაღდებული გვაქვს და ამ ტურნირისთვის მზადებას დღეიდან ვიწყებთ. კონფერენს ლიგაზე ძლიერი გუნდები არიან, თუმცა ჩვენ ჩვენი მიზანი გვაქვს, დღითიდღე უკეთესები ვხვდებით და იქაც შეგვიძლია წარმატების მიღწევა, ყველაფერი ჩვენზეა დამოკიდებული."
შეგახსენებთ, რომ კონფერენს ლიგის ძირითადი ეტაპის წილისყრა 28 აგვისტოს, თბილისის დროით 15 საათზე დაიწყება.
