სერია ა-ს 2026/2027 წლების სეზონის პირველ ტურში რომამ საკუთარ მოედანზე ფლორენციის ფიორენტინა ანგარიშით 4:0 გაანადგურა. "ჯალოროსიში" გაიბრწყინა დონი მალენმა, რომელმაც "ვიოლას" ჰეთ-თრიქი შეუსრულა. შეგახსენებთ, კალჩოში ის გადმოვიდა მხოლოდ იანვარში, მაგრამ 21 შეხვედრაში 18 ბურთის შეგდება ნიდერლანდელმა ფორვარდმა "მგლების" რიგებში უკვე მოასწრო.
სტადიო ოლიმპიკოს ბინადრების თავდამსხმელზე შედეგიანი არავინაა 2026 წელს, როგორც სერია ა-ში, ისე ზოგადად, ევროპის ტოპ ხუთ ლიგაში. არტემიო ფრანკის მკვიდრთა განადგურებით, ჯან პიერო გასპერინის გუნდის მე-14 ნომერს დაუგროვდა 17 ბურთი, რითაც ის ჰარი კეინს გაუთანაბრდა.
როგორც ვხედავთ, ინგლისელ თავდამსხმელს 27 წლის გოლეადორის სახით მოულოდნელი კონკურენტი გამოუჩნდა. ცალკე გამოსარჩევია პაულო დიბალა...სწორედ მისი საგოლე გადაცემებით შეაგდო მალენმა 3 ბურთი. ის გახდა პირველი მოთამაშე 2021 წლის მაისის შემდეგ, რომელმაც 3 ასისტით 1 მოთამაშეს გაატანინა.
ბოლო ასეთი ფეხბურთელი იყო ემანუელ ვინატო, ვისი საგოლე გადაცემებითაც სამი ბურთი შეაგდო როდრიგო პალასიომ, ფიორენტინასა და ბოლონიას შეხვედრაში. ერთი სიტყვით, რომა ახალ სეზონს იწყებს იმედისმომცემად ისე, როგორც არასდროს, პირველ რიგში არგენტინელი და ნიდერლანდელი ფორვარდების დამსახურებით.
