ტელეკომპანია ნტვ პლიუსის ყოფილ კომენტატორს წაყვანილი აქვს არაერთი საფეხბურთო მატჩი, მათ შორის 2010-2011 წლების სეზონის ჩემპიონთა ლიგის ფინალი, რომელშიც ბარსელონამ მანჩესტერ იუნაიტედი დაამარცხა. სწორედ ამ თამაშის შემდეგ შეადარა უტკინმა ევროსეზონის ტრიუმფატორები ქართულ კლუბს.
"ბარსელონა ჩემპიონთა ლიგის გამარჯვებულია, ასე თამაშობდა დინამო თბილისიც, 30 წლის წინ, როდესაც თასების მფლობელთა თასს იგებდა", - ამბობდა რუსი კომენტატორი. რაც შეეხება ყიფიანს, რუსი კომენტატორის არქივში არაერთი მიძღვნილი სტატია თუ კომენტარია. გთავაზობთ მის მიერ 12 წლის წინ დაწერილ ბლოგის ერთ-ერთ ნაწყვეტს, რომლის გმირი სწორედ ქართველი გამთამაშებელია.
"1981 წელი იყო ყიფიანის საუკეთესო წელი - თასების მფლობელთა თასი, დიდი ტურნირი. 1982-ში ის არ გამოიძახეს საბჭოთა კავშირის ნაკრებში და მუნდიალზე არ წაიყვანეს. ახლა ზუსტად 4-ჯერ ასაკოვანი ვარ, ვიდრე მაშინ. ამ ხნის მანძილზე ვისწავლე ენით აღუწერელი სამწვრთნელო გადაწყვეტილებების გაგება, მაგრამ რატომ ვერ წავიდა დავითი ესპანეთში გამართულ ტურნირზე, ჩემთვის ახლაც აუხსნელია.
ეს გაუგებარი იყო მაშინაც და ახლაც, დროის გასვლის და გამოცდილების მიღების შემდეგაც. მოხარული ვიქნებოდი, ვინმეს რომ აეხსნა ჩემთვის, რით ჩამორჩებოდა ქართველი გამთამაშებელი თუნდაც ზიკოს ან იმ დროის მარადონას. აი, სოკრატესს ის აშკარად აღემატებოდა, იმდროინდელ პლატინისაც შეშურდებოდა მისი.
შეგიძლიათ არ დამიჯეროთ, ამის შემოწმება ახლა ხომ შეუძლებელია, თუმცა ბურიაკი და გავრილოვი, რომლებიც დინამოს ნახევარმცველს არჩიეს, მასთან შედარებით უბრალო მეგარმონეები იყვნენ. ზოგჯერ ამბობენ, თამაშობს, როგორც სუნთქავსო - ცარიელი სიტყვებია. ჩემი აზრით, სუნთქვაში განსაკუთრებული არაფერია.
მე ვიტყოდი, თამაშობს, როგორც დადის. აი, მოძრაობაში არის რაღაც უნიკალური, მარტო შენთვის დამახასიათებელი. "პროფესორი" სწორედ ასე თამაშობდა. თბილისური გუნდის 10-იანი შეიძლება კოსტუმში გამოსულიყო მოედანზე და ეს ვერავის შეემჩნია. მისი რამდენიმე ნაბიჯი ბურთით მოდურს ხდიდა ყველაფერს, რასაც შეეხებოდა, თუნდაც იმ ადრეულ სიმელოტეს.
შეიძლება სიმელოტის გამოც უწოდეს ყიფიანს "პროფესორი". არ იყო ის პროფესორი. პროფესორი კარიერაა, თანამდებობაა, ბოლოს და ბოლოს, პროფესორები მრავლად არიან. სულაც არ ვამბობ, რომ ქართველ გამთამაშებელს სხვა მეტსახელი მოუხდებოდა, ან რა საჭიროა მეტსახელი - ყიფიანი და მორჩა! შონ კონერის იერსახე (ჯეიმს ბონდის შემდეგ) დავითს შეეფერება: მაღალი, ტანადი, ცოტათი მელოტი, ჭკვიანი თვალებით, სიტყვებით ვერ გადმოსცემ. ის დაუმარცხებელია. ეს ყველაფერი სწორედ დინამოს გამთამაშებელია და ის ცოტათი ბონდიც არის".
