საქართველო 9-16 თებერვალს ევროპის ზამთრის ახალგაზრდულ ოლიმპიურ ფესტივალს უმასპინძლებს. შეჯიბრი ბაკურიანში, თბილისსა და ბათუმში ჩატარდება.
ოლიმპიურ ფესტივალი სპორტის 8 სახეობაში (სამთო თხილამურობა, ბიატლონი, თავისუფალი სრიალი, ფიგურული ციგურაობა, ყინულის ჰოკეი, ციგურებით რბოლა, თხილამურებით რბოლა, სნოუბორდი) ჩატარდება. ბათუმი ფიგურული ციგურაობის შეჯიბრს უმასპინძლებს, თბილისში კი ჰოკეი გაიმართება. ტურნირში 45 ქვეყნის 1000- მდე სპორტსმენი მიიღებს მონაწილეობას.
შეჯიბრში საქართველოდან სპორტის სამ სახეობაში (ფიგურული ციგურაობა, სამთო-სათხილამურო სპორტი და ბიატლონი) 8 სპორტსმენი იასპარეზებს.
ოლიმპიური ფესტივალი ბაკურიანში 9 თებერვალს საზეიმოდ გაიხსნება.
ევროპის ზამთრის ახალგაზრდული ოლიმპიური ფესტივალის სამზადისი, ზამთრის სპორტი საქართველოში და ინფრასტრუქტურული სიახლეები, - ამ თემების შესახებ LaGazzetta.ge-სთან ინტერვიუში საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა ისაუბრა:
- საქართველომ 2015 წელს ზაფხულის ახალგაზრდულ ოლიმპიურ ფესტივალს უმასპინძლა, ამჯერად ევროპის ზამთრის ახალგაზრდული ოლიმპიური ფესტივალი ჩატარდება საქართველოში, რას მოუტანს ეს ტურნირი ქართულ სპორტს?
- 2025 წელს ჩატარებული ოლიმპიური ფესტივალისთვის საქართველომ მაღალი შეფასება მიიღო. საქართველო მერვე ქვეყანაა, რომელიც ევროპის ზამთრის ახალგაზრდულ ოლიმპიურ ფესტივალს უმასპინძლებს. მოგეხსენებათ, ზამთრის სახეობებისთვის ინფრასტრუქტურა ძალიან მნიშვნელოვანია, რაც ჩვენ არ გვქონდა და გვინდოდა შევექმნა შესაბამისი ინფრასტრუქტურა.
ქართველები ფიგურულ ციგურაობაში, სამთო სათხილამურო სპორტსა და ბიატლონში მიიღებენ მონაწილეობას და იმედია კარგად იასპარეზებენ. პეკინში გამართულ ოლიმპიადაზე, 2022 წელს ფიგურულმა მოციგურავეებმა გუნდურ ასპარეზობაში ექვსეულში მოხვედრა შეძლეს, მეხუთე-მეექვსე ადგილი გავინაწილეთ.
- „ბაკურიანი 2025-სთვის” შექმნილი ინფრასტრუქტურა რამდენად მნიშვნელოვანია განვითარებისთვის?
- ჩვენი სპორტსმენები ძირითადად შეკრებას უცხოეთში გადიოდნენ, რადგან ჩვენ არ გვქონდა შესაბამისი ინფრასტრუქტურა. ამიერიდან ჩვენ გვექნება 2 სტანდარტული ყინულის მოედანი, ერთი თბილისში და ერთი ბათუმში. ბაკურიანი 2025 საქართველოში ზამთრის სპორტის სახეობების განვითრებას ხელს შეუწყობს.
ჰოკეი თბილისში ჩატარდება, ფიგურული ციგურაობა კი ბათუმში. მოგეხსენებათ, ყინულის მოედანს სპეციალური პირობები სჭირდება, აკვირდებიან სპეციალისტები და ყველაფერი კარგადაა. რა თქმა უნდა, ჩვენ მედლის მოპოვება გვინდა, რეიტინგიდან გამომდინარე ფიგურულ ციგურაობაში ინგა გურგენიძეს ექნება შანსი.
- რას ფიქრობთ, რამდენად გაიზრდება ჩართულობა ზამთრის სპორტის სახეობებში?
- ზამთრის სპორტზე მოთხოვნა გვაქვს. ინფრასტრუქტურის შექმნა კი რა თქმა უნდა, გაზრდის მოთხოვნას და შესაძლებლობას მისცემს დაინტერესებულებს. მოგეხსენებათ, მაგალითად ბაკურიანს ზამთრის სპორტში დიდი ტრადიცია აქვს, ტრამპლინიდან ხტომაში სახელოვანი სპორტსმენი კობა წაქაძე ასპარეზობდა. გვინდოდა ტრამპლინი გაგვეკეთებინა ბაკურიანში, სადაც ადრე იყო იმავე ადგილას იგეგმებოდა გაკეთება, თუმცა ეს არ იყო ამ ტურნირის მთავარი აუცილებლობა.
ბაკურიანში ამჟამად უკვე მოწყობილია სათხილამურო ტრასა და სპეციალისტების მაღალი შეფასება მიიღო, რაც შესაძლებლობას მოგვცემს ჩვენ ქვეყანაში ჩავატაროთ სხვადასხვა ტურნირები, იცით რომ ბოლო წლებში ბაკურიანი მსოფლიო თასის ეტაპებს მასპინძლობს. ასევე ახალი ინფრასტრუქტურა შესაძლებლობას იძლევა როგორც ქართველმა, ასევე სხვადასხვა ქვეყნებიდან სპორტსმენმა შეკრება ბაკურიაში გაიარონ. აღსანიშნავია, რომ გარდა სპორტული ინფრასტრუქტურისა ბაკურიანში არის მაღალი დონის სასტუმროები, რამაც ოლიმპიური ფესტივალის მასპინძლობის მოპოვებაში მნიშვნელოვანი წვლილი შეიტანა.
- ინფრასტრუქტურასთან ერთად ზამთრის სპორტის სახეობების განვითარებისთვის მნიშვნელოვანია კვალიფიციური პერსონალი, ამასთან დაკავშირებით რა გეგმები აქვს ოლიმპიურ კომიტეტს?
გამართულ ინფრასტრუქტურასთან ერთად რა თქმა უნდა, მნიშვნელოვანია კვალიფიციური პერსონალი. ოლიმპიური კომიტეტი ჩართულია, ჩვენ გვაქვს სოლიდარობის პროგრამა, რაც შესაძლებლობას იძლევა, მოვიწვიოთ სპეციალისტები და კვალიფიკაციის ასამაღლებელი ტრენინგები გაიარონ მწვრთნელებმა.
- ყინულის მოედნებს განსაკუთრებული მოვლა და პირობები სჭირდება, ოლიმპიური ფესტივალის დასრულების შემდეგ რამდენად შენარჩუნდება ყინულის დარბაზები?
დიახ, ყინულს განსაკუთრებული პირობები სჭირდება. მოთხოვნა ფიგურულ ციგურაობასა და ჰოკეიზე გვაქვს, ყინულზე მოთხოვნა არის როგორც თბილისში ასევე ბათუმში, შესაბამისად, დარბაზების აუცილებლობა გვაქვს. ძვირადღირებულია, რა თმა უნდა ყინულის მოედნების მოვლა, თუმცა მოთხოვნიდან გამომდინარე, შეგვიძლია ზაფხულშიც და ზამთარშიც იმუშაოს.
