ალექსი დავითაშვილს სპორტის 4 სხვადასხვა სახეობაში უასპარეზია: ძიუდო, ჭიდაობა, სამბო და სუმო. მოპოვებული აქვს სხვადასხვა საერთაშორისო გამარჯვებები. რამდენიმე საათის წინ ვეტერანმა სპორტსმენმა, აშშ-ში, ლას-ვეგასში მიმდინარე ვეტერან ძიუდოისტთა მსოფლიოს ჩემპიონატზე ოქროს მედალი მოიპოვა და რვაგზის მსოფლიოს ჩემპიონობა იზეიმა.
ალეკო დავითაშვილს სპორტულ საქმიანობასთან ერთად, გულშემატკივარი ძიუდოს რეპორტაჟებიდანაც იცნობს, გამორჩეული მანერითა და გულიანი, სახასიათო, შეძახილებით კომენტატორის რანგში, ეკრანიდან ცდილობს ქართველ ძიუდოისტებს მუხტი გადაცეს და გამარჯვებაში დაეხმაროს.
მსოფლიოს ჩემპიონობა 8-ჯერ ალექსი დავითაშვილისთვის კარიერის პიკი არ არის და მისი მიზანი ამ ციფრის მნიშვნელოვნად გაზრდაა. ქართველ ჩემპიონს La Gazzetta dello Sport Georgia აშშ-ში დაუკავშირდა, წარმატება მიულოცა და ჩემპიონობასა და სამომავლო გემების შესახებ, ჩემპიონმა Lagazzetta.ge-სთან ინტერვიუში ისაუბრა:
- გილოცავთ მსოფლიოს ჩემპიონობას, რა გრძნობაა ამ ტიტულის 8-ჯერ მოგება?
- ჩემ კარიერაში ეს ყველაზე დაძაბული ჩემპიონატი იყო. რა თქმა უნდა, მთელი მონდომებით ვემზადებოდი. 8-ჯერ ვიყავი საქართველოს აბსოლუტური ფალავანი. ყველაზე ძალიან მინდოდა ეს გამარჯვება. 4 დღე აქ ვარ და გულწრფელად გეტყვით, ვერ დავიძინე, თან როცა ვიცი აქ ხალხი ჩემ გამო ჩამოვიდა და ვინც ამერიკაშია ჩემ სანახავად მოვიდა. მადლობა ღმერთს, რომ შევძელი და კვლავ ვიზეიმე ჩემპიონობა.
- ჩემპიონატზე კონკურენციის დონეზე რას იტყვით?
- წელს განსაკუთრებით მაღალი კონკურენცია იყო, 70-მდე ქვეყნიდან 1200-მდე სპორტსმენი, ერთ წონაში 50-მდე მონაწილე. ეს ძიუდოს საერთაშორისო ფედერაციის ოფიციალური ტურნირია და ყველა განსაკუთრებულად მომზადებულია. აღსანიშნავია, რომ საქართველოდან ვეტერანთა შორის მონაწილეობის რაოდენობა მნიშვნელოვნად გაიზარდა.
- თქვენი თაობის სპორტსმენებში რა დატვირთვით ვარჯიშობთ?
- ვეტერანებს შორის ასპარეზობა შესაძლებლობას გაძლევს მთელი ცხოვრება სპორტში იყო. სულ ძიუდოში ხარ. მე სრული დატვირთვის ვვარჯიშობდი, ყოველდღე, მთელი ზაფხული არ დამისვენია და სურვილიც არ მქონია. არა როგორც ვეტერანი, არამედ როგორც მოქმედი სპორტსმენი - დაახლოებით ამ დატვირთვით ვვარჯიშობდი. დიდი მონდომებით ვემზადებოდი მსოფლიოს ჩემპიონატისთვის და ჩემთვის მთავარი პრიორიტეტი სწორედ ეს ტურნირი იყო.
- რას ეტყვით ახალგაზრდა სპორტსმენებს?
- მე თავად ვარ მწვრთნელი, 150-მდე ბავშვს ვავარჯიშებ და რა თქმა უნდა, ჩემ მოსწავლეებს ვეუბნები, ვინც შრომობს, გულით მიუდგება საქმეს და ბოლომდე იბრძოლებს, ღმერთი არ გაწირავს, ის აუცილებლად შეძლებს მიზნის მიღწევას. დარბაზიდან არასდროს გამოვდივარ ისე ვიდრე რაც გეგმაში მაქვს ყველა ვარჯიშს არ შევასრულებ.
- საქართველოს ძიუდოს ამჟამინდელი ნაკრებიდან ვის გამოყოფთ?
- ძალიან ბევრი ნიჭიერი და კარგი ძიუდოისტები გვყავს და ძალიან მახარებს მათი წარმატება. არ მინდა ვინმეს ეწყინოს, თუმცა რომ მკითხოთ, ამ დროისთვის მსოფლიოში საუკეთესო ძიუდოისტი ვინ არის? - გეტყვით, ლაშა ბექაური. ეს ბიჭი ოლიმპიურ ჩემპიონადაა დაბადებული. იმედი მაქვს ყველა მიზანს მიაღწევს, მჯერა მესამედაც მოიგებს ოლიმპიადას.
- რას ეტყვით ქართველ ხალხს?
- ჩემ ხალხს ვეტყვი და მინდა იცოდნენ რომ ძალიან, ძალიან, მიყვარს ყველა. ქუჩაში რომ გამოვდივარ და ყველგან ხალხის დიდ სიყვარულს ვგრძნობ, ეგ არის ჩემი მთავარი მოტივაცია.
- რა არის თქვენი მიზანი?
- რაც შეიძლება მეტჯერ მოვიგო მსოფლიოს ჩემპიონატი, 13 ითქვა, თუმცა 10-ჯერ მაინც მინდა მოვიგო. ის ემოცია, როცა კვარცხლბეკზე დგახარ, შეუდარებელია, მე მნიშვნელოვან პრემიებს არ ვიღებ, ძიუდოს ფედერაცია მაფინანსებს და ახმეტის მერია ბოლო 3 წელია პრემიას მაძლევს, რისთვისაც მადლობა მინდა ვუთხრა მათ. ყველაზე დიდი ჯილდო და ბედნიერება არის ის, რომ ჩემი სამშობლოს დროშას ყველაზე მაღლა ვწევ და ჰიმნს ვაკვრევინებ, ამაზე დიდი ბედნიერება არ არსებობს.
ფოტო: ძიუდოს საერთაშორისო ფედერაცია
