მომავალი ტურნირის სამზადისისა და ოლიმპიური გეგმების შესახებ, La Gazzetta dello Sport Georgia-სთან საქართველოს მოკრივეთა ნაკრების მთავარმა მწვრთნელმა, ბეჟან ჭიჭინავამ ისაუბრა:
- ქართველ მოკრივეებს ოლიმპიადის სალიცენზიო ტურნირი ელით, როგორ ემზადებით?
- 9 მაისიდან ვიწყებთ შეკრებას, ტაილანდი მასპინძლობს მსოფლიო სარეიტინგო ტურნირს, სადაც გათამაშდება ოლიმპიური ლიცენზიები, კრივში პროგნოზების გაკეთება რთულია, თუმცა იმედი მაქვს 1-2 ლიცენზიას მოვიპოვებთ. აღნიშნულ ტურნირზე 4 ლიცენზია თამაშდება.
- შეჯიბრებისთვის მოსამზადებლად შესაბამისი პირობები გაქვთ?
- დიახ, ამ ეტაპზე ნამდვილად ყველანაირი პირობა გვაქვს. მე რა საჭიროებასაც დავასახელებ, როგორც მთავარი მწვრთნელი, ყველაფერი კეთდება, რათა ჩვენმა სპორტსმენებმა სათანადო მომზადება შეძლონ.
- ქართველ მოკრივეებს რა შანსი ექნებათ ოლიმპიურ თამაშებზე?
- ვინც აიღებს ლიცენზიას, ყველას აქვს შანსი მედლისთვის იბრძოლოს, თუმცა წილისყრასაც დიდი მნიშვნელობა აქვს. მოგეხსენებათ, ძალიან განვითარებულია მსოფლიოში კრივი და ოლიმპიადაზე უძლიერესი სპორტსმენები ხვდებიან, ლიცენზიის მოპოვებაც ძალიან რთულია. მაგალითად, 70 სპორტსმენი მონაწილეობდა ესკერხან მადიევის (71 კგ.) წონაში, 70-ში უნდა იყო საუკეთესო, მსოფლიოს საუკეთესო მოკრივეებს შორის, ეს წარმოუდგენელი რაოდენობა იყო, მსგავსი შემთხვევა ჩემს პრაქტიკაში არ მქონია. მადიევს ოლიმპიურ თამაშებზე მონაწილეობის გამოცდილება აქვს. ძლიერი მოკრივეები გვყავს და ვნახოთ, რამდენი შეძლებს ოლიმპიური თამაშების საგზურის მოპოვებას.
- ამ ეტაპზე კრივში ერთი ლიცენზია აქვს საქართველოს, რომელიც ლაშა გურულმა ევროპულ თამაშებზე შარშან მოიპოვა, რას იტყვით ლაშას შესახებ?
- ლაშა ძალიან მშრომელი სპორტსმენია, ბევრს მუშაობს საკუთარ თავზე, შრომისმოყვარეა და პასუხისმგებლობის გრძნობაც აქვს. იმავეს ვიტყვი მადიევზეც, ყველა კარგი სპორტსმენი გვყავს. ლაშას თანამედროვე სტილი აქვს, ახლა ევროპის ჩემპიონატზე მე-5 მედალი მოიპოვა, 2 მედალი მსოფლიოს ჩემპიონატზე აქვს, ასევე ევროპული თამაშების ვიცეჩემპიონია. ხშირად, სადაც ჩავდივართ ხოლმე გულშემატკივრები სპეციალურად მოდიან ლაშას ბრძოლის საყურებლად.
- ოლიმპიურ კონკურენციაზე რას იტყვით?
- მსოფლიოს რჩეული სპორტსმენები იქნებიან, მანდ სუსტი არავინ იქნება. თან ლაშას წონაში სუსტები არ არსებობენ, არის ლიდერი სამგზის მსოფლიოს ჩემპიონი, წარმოშობით ფრანგი, სოფიენ უმია, მაგრამ ჩვენ შეგვიძლია მასთან მუშაობა, ევროპულ თამაშებზე ლაშა ფინალში შეხვდა. ჩვენ ყველაფერს გავაკეთებთ, რაც შეგვიძლია, შესაბამისად მოვემზადებით და საქართველოს ნაკრების ყველა მოკრივე ბოლომდე იბრძოლებს ლიცენზიის მოსაპოვებლად. შემდეგ უკვე კი ოლიმპიურ თამაშებზე გავაგრძელებთ ბრძოლას.
შეგახსენებთ, XXXIII ოლიმპიური თამაშებს საფრანგეთის დედაქალაქი 26 ივლისიდან 11 აგვისტოს ჩათვლით უმასპინძლებს.
