მეორე ტრებლი ინგლისურ გუნდთან ერთად - ფერგიუსონის ჩამოტოვება
1998/1999 წლების სეზონი მანჩესტერ იუნაიტედმა დახურა ტრებლით, რაც პრემიერ ლიგის გუნდისთვის უპრეცედენტო შემთხვევა იყო. 24 წლის შემდეგ, ფერგიუსონის მიღწევა გაიმეორა სწორედ გვარდიოლამ, რის შემდეგაც მათ შორის ამ კომპონენტში ტოლობის ნიშანი იქნა დასმული. სავსებით ლოგიკური იქნება, თუ "ლურჯები" გაისად კიდევ ერთი ტრებლისკენ გაიწევენ.
გვარდიოლას გუნდს ამის რესურსი აქვს როგორც შემადგენლობის, ისე მოტივაციის მხრივაც. ნაკლებად სავარაუდოა, რომ პრემიერ ლიგის ტრიუმფატორებს გაისად ჰქონდეთ საკადრო პრობლემები, პირიქით, ესპანელი ტაქტიკოსი თავის ბოლო სეზონს მაქსიმალურად გაძლიერებული შეხვდება. ამის გარდა, როგორც აღვნიშნეთ, შოტლანდიელ სპეციალისტსა და პეპს შორის ტრებლის საკითხში ფრე არის. 2:1 და წასვლა, რატომაც არა?!
პრემიერ ლიგის დაუმარცხებლად მოგება 90+ ქულით - ვენგერის ჩამოტოვებადიახ, ეტიჰადელთა მწვრთნელმა პრემიერ ლიგა შვიდ სეზონში მოიპოვა ექვსჯერ, თუმცა დაუმარცხებელი ჩემპიონის სტატუსი მხოლოდ ვენგერს აქვს. 2003/04 წლების სეზონში ლონდონის არსენალმა მოიგო 26 მატჩი და 12 თამაშში დააფიქსირა ფრე, რაც საერთო ჯამში 90 ქულაა. 53 წლის ტაქტიკოსს დაუგროვებია მეტიც, მაგრამ არა წაგების გარეშე.
თანამედროვე ფეხბურთში არსებული გადატვირთული გრაფიკის გათვალისწინებით, პრემიერ ლიგის დაუმარცხებლად მოგება ჩანს წარმოუდგენელი, თუმცა არა გვარდიოლასთვის, რომელიც მოტივაციის ნაკლებობას არასდროს უჩივის. სიტი აუცილებლად გაიწევს ზედიზედ მე-5 ჩემპიონობისთვის, თანაც ამჯერად წაუგებლად, 90+ ქულით, "მეთოფეების" რეკორდის გაბათილებით.
მე-7 ჩემპიონობა ინგლისში - პეისლისა და რემზის ჩამოტოვება
ინგლისის ჩემპიონობა ყველაზე მეტჯერ უზეიმია სერ ალექსს, რომელმაც აღნიშნული ჯილდო 13-ჯერ აღმართა. დიახ, ესპანელი მწვრთნელი ერთ სეზონში ფიზიკურად ვერ დაამხობს "მანკუნიანელთა" ლეგენდარული სპეციალისტის რეკორდს, მაგრამ მას შეუძლია ჩამოიტოვოს პეისლი და რემზი, რომლებსაც მის მსგავსად 6 ჩემპიონის ტიტული აქვთ.
ინგლისელმა მწვრთნელმა ექვსი ჩემპიონობა იზეიმა ლივერპულთან ერთად, 1976-1983 წლებში, შოტლანდიელმა სპეციალისტმა კი ბირმინგემის ასტონ ვილასთან ერთად, 1894-1910 წლებში. მანჩესტერელთა მორიგი ტრიუმფის შემთხვევაში, პეპი ინგლისის ჩემპიონი გახდება 7-ჯერ: საოცარი მიღწევა იმის გათვალისწინებით, რომ ის პრემიერ ლიგაში 2016-დან მოღვაწეობს.
