როგორც წესი, ახალ კლუბებში კვარაცხელია სადებიუტო მატჩებში თითქმის ყოველთვის შედეგიანია.
2017 წელს, კვარაცხელია 17 წლის იყო და ტალანტად ითვლებოდა, როცა ეროვნულ ლიგაში მისი დებიუტი შედგა. ფოთის კოლხეთის წინააღმდეგ ის შეცვლაზე 62-ე წუთზე შევიდა და საგოლე გადაცემა მიითვალა.
დინამო თბილისიდან რუსთავში წასული კვარაცხელია პირველად სამტრედიას წინააღმდეგ თამაშობს. რუსთავი 2:1 იგებს, კვარა კი მოედანზე გამორჩეული იყო. ხვიჩამ არც რუსთავში დააყოვნა და შემდეგ ტურშივე ლოკომოტივთან ასისტი გააკეთა.
რუსთავიდან ის ლოკომოტივში გადავიდა, თუმცა მოსკოვურ კლუბში სადებიუტო შეხვედრაში მხოლოდ 4 წუთი დაჰყო. სამაგიეროდ, კვარამ რუბინში პირველივე მატჩში თავის ყოფილ გუნდს, ლოკომოტივს გაუტანა და გოლი არ აღნიშნა.
ამასობაში, საქართველოს ნაკრების დროც მოვიდა. ნაკრებში კვარას დებიუტი 2019 წელს შედგა. დინამო არენაზე გამართული მატჩი საქართველოსა და გიბრალტარს შორის, ჩვენი გამარჯვებით 3:0 დასრულდა. კვარაცხელიამ ერთი ტაიმი ითამაშა.
მოგეხსენებათ, რუბინიდან კვარაცხელია დინამო ბათუმში დაბრუნდა. პირველი შეხვედრა მან თელავის წინააღმდეგ ჩაატარა და ერთი ტაიმი დაჰყო. ბათუმმა 1:0 გაიმარჯვა. მალევე კვარაცხელიამ სეზონის გამორჩეული მატჩი ჩაატარა და გაგრასთან 2 გოლი და ერთი ასისტი გააკეთა.
2022 წელს, კვარაცხელია ნაპოლიში გადავიდა. სერია ა-ს პირველივე ტურში მან ვერონასთან გოლი გაიტანა და მთელი იტალია და საქართველო აალაპარაკა. მალევე მან ჩემპიონთა ლიგაზე უძლიერესი ლივერპული არ დაინდო, კარიერის ერთ-ერთი საუკეთესო მატჩი ჩაატარა და საგოლე გადაცემა გააკეთა.
2025 წელს, კვარაცხელია 70 მილიონი ევროს სანაცვლოდ პსჟ-ში გადადის. ლიგა 1-ის პირველ მატჩს რეიმსის წინააღმდეგ ატარებს, თამაშის წინ მას წარდგენას უწყობენ და პირველივე მატჩში საგოლე გადაცემას აკეთებს.
