ბარსელონას პრეზიდენტი ჟოან ლაპორტა კვლავ ადასტურებს, რომ კატალონიური კლუბი ხულიან ალვარესის დამატებით სერიოზულად არის დაინტერესებული. მისი თქმით, "ბლაუგრანა“ მზად არის, ფეხბურთელის ტრანსფერზე ატლეტიკოსთან შეთანხმებას მიაღწიოს და მადრიდულ კლუბს მაქსიმალური პატივისცემით ეპყრობა.
"ჩვენ კვლავ ძალიან დაინტერესებული ვართ ხულიან ალვარესით. გვსურს, ჩვენი შეთავაზება მიიღონ და ამას ატლეტიკო მადრიდის მიმართ უდიდესი პატივისცემით ვაკეთებთ"- განაცხადა ლაპორტამ.
ბარსელონას პრეზიდენტის თქმით, კლუბმა მადრიდელებს შეთავაზება უკვე გაუკეთა და ის სატრანსფერო ფანჯრის დახურვამდე ძალაში დარჩება.
"მათ იციან, რომ თუ ამ ზაფხულს ფეხბურთელის გაყიდვას გადაწყვეტენ, ჩვენ მზად ვიქნებით მის შესაძენად, თუკი ჩვენს შეთავაზებაზე შეთანხმებას მივაღწევთ. ატლეტიკო მადრიდისა და მისი ხელმძღვანელობის მიმართ, რომლებსაც მრავალი წელია ვიცნობთ, უდიდეს პატივისცემას ვიჩენთ. ჩემი შეთავაზება მიგელ ანხელ ხილთან ზარითაც დავადასტურე. ჩვენამდე მოდის ინფორმაცია, რომ ატლეტიკოს ფეხბურთელის გაყიდვა სურს, ამიტომ ჩვენი შეთავაზება სატრანსფერო ბაზრის დახურვამდე ძალაში რჩება"-აღნიშნა ლაპორტამ.
თუმცა, ატლეტიკოში ბარსელონას პოზიციას კატეგორიულად არ ეთანხმებიან და აცხადებენ, რომ ხულიან ალვარესის კატალონიურ კლუბში გადასვლის შანსი ნულის ტოლია.
"ფეხბურთელს მსხვერპლად აქცევენ, მაგრამ ხულიანის საქმეში ერთადერთი მსხვერპლი ჩვენ ვართ. მათ ჩვენ ეკონომიკურად და სოციალურად დაგვაზარალეს. ბარსელონაში მისი გაყიდვის შანსი 0%-ია. ეს ფულზე არ არის, ეს ღირსების საკითხია. მიმდინარეობს კამპანია, რომელიც უამრავ სიცრუესა და ნახევრად სიმართლეს შეიცავს. ამ ყველაფრის საფასურს მხოლოდ ატლეტიკო იხდის"- აცხადებენ მადრიდულ კლუბში.
ამასთან, ატლეტიკო ბარსელონასთან მიმდინარე სამართლებრივ დავაში შემდეგი ნაბიჯის გადადგმასაც გეგმავს და, Cadena SER-ის ცნობით, საქმეში ხულიან ალვარესზე ბარსელონას მხრიდან განხორციელებულ ზეწოლასთან დაკავშირებული დამატებითი მტკიცებულებებისა და შესაძლო შედეგების შეტანას აპირებს. მადრიდელები პოზიციას არ ცვლიან, თავად ალვარესი კი ჯერ კიდევ ვერ ეგუება იმ რეალობას, რომ ბარსელონაში გადასვლა პრაქტიკულად გამორიცხულია.
სიტუაციას ყურადღებით აკვირდება არსენალი, რომელიც ალვარესის ტრანსფერზე მუშაობას აგრძელებს. თუმცა, ამ მომენტისთვის არგენტინელს ლონდონურ კლუბში გადასვლა არ სურს.
შეგახსენებთ, ევროპის მასშტაბით სატრანსფერო ფანჯარა 1 სექტემბერს იხურება.
