პრაღის სლავიას კარში გატანილი გოლის შემდეგ, რობერტ ლევანდოვსკის ჩემპიონთა ლიგაზე ბარსელონას მაისურით 20 ბურთი დაუგროვდა. პოლონელი ფორვარდი გახდა მე-4 მოთამაშე ევროპის მთავარი საკლუბო ტურნირის ისტორიაში, რომელმაც მინიმუმ 20 ბურთი ორ სხვადასხვა კლუბში შეაგდო.
პოლონეთის ნაკრების კაპიტანმა 69 ბურთი გაიტანა მიუნხენის ბაიერნში, 20 კი როგორც აღვნიშნეთ, კატალონიურ გუნდში. ის ძალიან ახლოს იყო იმასთანაც, რომ მის რეზიუმეში ყოფილიყო 3 კლუბი 20-ბურთიანი ნიშნულით, მაგრამ დორტმუნდის ბორუსიაში თამაშის დროს, "ბლაუგრანას" ამჟამინდელი მე-9 ნომერი 17 გოლით შემოიფარგლა.
რაც შეეხებათ დანარჩენებს, პირველმა 20 გოლი ორი გუნდის მაისურით გაიტანა კრიშტიანუ რონალდუმ, რეალ მადრიდისა და მანჩესტერ იუნაიტედის რიგებში, 105 და 21 ბურთი. შემდეგ, ნეიმარ ჟუნიორმა, კამპ ნოუს ბინადრებისა და პარის სენ-ჟერმენის სახელით, 21 და 22 გოლი, მოგვიანებით, ჰარი კეინმაც, "რეკორდმაისტერსა" და ტოტენჰემში, 26 და 21 ბურთი.
როგორც აღვნიშნეთ, ლევანდოვსკი ელიტური სიის მეოთხე წევრია. შორს არ არის ის დრო, როდესაც ამ ჩამონათვალს კილიან მბაპეც შეუერთდება. ფრანგმა ფორვარდმა ევროპის მთავარ საკლუბო ტურნირზე "სამეფო კლუბის" მაისურით უკვე შეაგდო 18 ბურთი, პსჟ-ში თამაშის დროს კი მის ანგარიშზე 42 გოლი იყო.
