დღეს ბუდაპეშტში სეზონის გამორჩეული მატჩი გაიმართება. პსჟ ჩემპიონთა ლიგის ფინალში არსენალს დაუპირისპირდება და ამ ტიტულის მოგებას ზედიზედ მეორედ შეეცდება.
თუ პარიზელები არსენალის ოცნებებს დაამსხვრევენ და გაიმარჯვებენ, ხელმძღვანელობისგან გიგანტური ბონუსები ელით.
პსჟ-ს ხელმძღვანელობის ხედვა ერთია - გუნდში ყველა თანასწორია, არ აქვს მნიშვნელობა, ვინ თამაშობს, ვინ ზის სკამზე და ვინ ვერ ხვდება განაცხადში. შესაბამისად, ჩემპიონთა ლიგის მოგების შემთხვევაში, პარიზელთა თითოეული მოთამაშე ბონუსად 1 მილიონ ევროს მიიღებს.
ამასთანავე, ბონუსი ლიგა 1-ის მოგებაზეც იქნება, რომელიც პსჟ-მ მე-14-ედ მოიგო. თუ აქამდე ფეხბურელებს ბონუს სისტემა კონტრაქტში ეწერათ, ახალი ხელმძღვანელობის მოსვლის შემდეგ, სიტუაცია შეიცვალა და წარმატებული სეზონისთვის ყველა მოთამაშე კუთვნულ ბონუსს მიიღებს.
მიუხედავად იმისა, რომ ხვიჩა კვარაცხელია, დეზირე დუე და ჟოაო ნევეში პსჟ-ს მთავარი ვარსკვლავები არიან, ისინი ზუსტად იგივე ბონუსს მიიღებენ, რასაც კვენტინ ნჯანტუ, რომელმაც ჩემპიონთა ლიგის ჯგუფურ ეტაპზე სამჯერ ითამაშა.
