სტატიაში ამორიმის შესახებ ყველა საინტერესო ინფორმაციას გაგიზიარებთ და გეტყვით, თუ რატომ შეაჩერა მანჩესტერ იუნაიტედმა მასზე არჩევანი.
39 წლის სპეციალისტს ბოლო რამდენიმე წლის განმავლობაში უკავშირებდნენ ტოპ ლიგების საკმაოდ დიდ კლუბებს. მხოლოდ 2024 წელს ის იყო ბარსელონას, ლივერპულისა და ჩელსის სათავეში მოხვედრის ერთ-ერთი მთავარი კანდიდატი. საქმეში იყო ვესტ ჰემიც, სადაც მხარეებმა სამომავლო გეგმებიც კი განიხილეს, თუმცა ბოლო მომენტში გარიგება ჩაიშალა. ახლა კი ვისაუბროთ იმ საინტერესო ფაქტებსა და დეტალებზე, რის გამოც ამორიმმა ამდენი კლუბის ინტერესი დაიმსახურა.
წარსული:
ამორიმმა პირველი ნაბიჯები სამწვრთნელო კარიერაში 2018 წელს გადადგა, როდესაც კაზა პია ჩაიბარა, თუმცა პორტუგალიის ქვედა დივიზიონის გუნდში მან მხოლოდ 4 მატჩის ჩატარება მოასწრო, რადგან მალევე ბრაგაში გადაბარგდა. 34 წლის სპეციალისტი ბრაგას მეორე გუნდის მთავარი მწვრთნელი გახდა, თუმცა დიდი დრო არც აქ გაუტარებია.
ბრაგამ 2019 წლის დეკემბერში, მთავარი მწვრთნელი რიკარდო სა პინტუ გუნდიდან გაუშვა, რასაც რუბენ ამორიმის მთავარ გუნდში დაწინაურება მოჰყვა. მას შემდეგ, რაც ამორიმმა მოიგო თავისი პირველი თამაში ბელენენსესთან ანგარიშით 7:1, ბრაგა სწრაფად გახდა ის გუნდი, რომელსაც შეეძლო ნებისმიერი მეტოქის დამარცხება. იანვრის შუა რიცხვებიდან თებერვლის შუა რიცხვებამდე, დამქანცველ კალენდარში, ბრაგა ორჯერ დაუპირისპირდა პორტოსა და სპორტინგს, ხოლო ბენფიკას ერთხელ — პორტუგალიაში ასეთ გამოცდას ძალიან ცოტა თუ აბარებს, მაგრამ ბრაგამ მოახერხა და ხუთივე მატჩი მოიგო, მათ შორის პორტუგალიის ლიგის თასსაც დაეუფლა, სადაც ამორიმის გუნდმა პორტო დაამარცხა. ახალაგზრდა სპეციალისტმა მოახერხა და თავისი პირველი ტიტული მოიგო!
ლოგიკურია, რომ ამორიმის მიმართ ინტერესი მალევე გაიზარდა, რასაც სპორტინგის გადადგმული ნაბიჯიც მოჰყვა — 2020 წლის მარტში, სპორტინგმა პორტუგალიერი სპეციალისტის კონტრაქტში ჩაწერილი გამოსასყიდი თანხა €10 მილიონი გააქტიურა და გარიგებაც დახურა. სპორტიგნმა ამ ნაბიჯით კლუბის ახალი ფურცლის წერა დაიწყო, შანსი მიეცა სრულიად გამოუცდელ სპეციალისტს, რომელიც თავის დროზე ბენფიკას ღირსებას იცავდა... ეს იყო სარისკო ნაბიჯი, თუმცა საბოლოო ჯამში, გამართლებული.
როდესაც ამორიმი 2020 წლის მარტში სპორტინგში მივიდა, გუნდს პორტუგალიის ლიგის ტიტული თითქმის 18 წლის განმავლობაში არ ჰქონდა მოგებული. 2009 წლიდან მათ მხოლოდ ორჯერ დაასრულეს მეორე ადგილზე გათამაშება და ოთხჯერ გავიდნენ მესამე პოზიციაზე... ეს შედეგები კი კლუბისთვის მიუღებელი იყო.
მაგრამ ამორიმმა პირველი სრული სეზონის ბოლოს (2020/21), სპორტინგის ფანებს ხანგრძლივი ნატვრა აუხდინა და ჩემპიონობა იზეიმეს! ეს იყო საოცარი სვლა, რომელიც თითქმის წაუგებლად დასრულდა. მთელი სეზონის განმავლობაში, სპორტინგი ყველა სხვა გუნდს მინიმუმ ერთი თავით აღემატებოდა და მათი ჩემპიონობა ეჭვქვეშ არასდროს დამდგარა.
მაგრამ ამორიმმა პირველი სრული სეზონის ბოლოს (2020/21), სპორტინგის ფანებს ხანგრძლივი ნატვრა აუხდინა და ჩემპიონობა იზეიმეს! ეს იყო საოცარი სვლა, რომელიც თითქმის წაუგებლად დასრულდა. მთელი სეზონის განმავლობაში, სპორტინგი ყველა სხვა გუნდს მინიმუმ ერთი თავით აღემატებოდა და მათი ჩემპიონობა ეჭვქვეშ არასდროს დამდგარა.
ამორიმის მეორე სეზონი პირველის მსგავსად, წარმატებული ვეღარ იყო, სპორტინგმა მეორე პოზიციაზე დაასრულა ჩემპიონატი, ტიტული კი პორტოს დარჩა. შემდეგ იყო ახალი სეზონი და სრული კრახი — სპორტინგი სამეულშიც კი ვერ გავიდა და ჩემპიონატი მე-4 ადგილზე დაასრულა. ამ ყველაფერს კი ლოგიკურად კითხვები მოჰყვა... მაგრამ 2023/24 სეზონში, ამორიმმა ყველა კრიტიკოსის გაჩუმება მოახერხა და სპორტინგი კვლავ ტიტულამდე მიიყვანა, თანაც ბენფიკას არც მეტი, არც ნაკლები 10 ქულით გაასწრო.
სათამაშო სტილი:
კითხვა, რომელსაც მანჩესტერ იუნაიტედის გულშემატკივართა უმეტესობა დასვამს — როგორ ითამაშებს გუნდი ამორიმის ხელში, როგორი სტილი ექნება ოლდ ტრაფორდის ბინადრებს და რა შეიცვლება წინა წლებთან შედარებით?
ამორიმის მენეჯერული კარიერის ერთ-ერთი ყველაზე გამორჩეული ასპექტი და ასევე წარმატების გასაღები, 3 ცენტრალური მცველით თამაშია. ეს მნიშვნელოვანი დეტალია, რადგან მანჩესტერ იუნაიტედში ამ სქემას ძალიან იშვიათად თუ იყენებდნენ, განსაკუთრებით, ერიკ ტენ ჰეგის დროს. იყო შემთხვევები წინა მენეჯერების დროს, თუმცა ოთხი მცველი, ყოველთვის ნორმად ითვლებოდა ოლდ ტრაფორდზე.
ამორიმი ძირითადად ორ სათამაშო სქემას იყენებს: 3-4-3 და 3-4-2-1. პორტუგალიელის გუნდში ძალიან დიდი მნიშვნელობა ენიჭება ფლანგის ფეხბურთელებს, ე.წ. "ვინგბექებს", რომლებიც შეტევის დროს, ძალიან დიდ როლს თამაშობენ.
ორივე სათამაშო სქემაში, ამორიმი იყენებს ორ საყრდენ ნახევარმცველს, რომლებიც შეტევის დროს უკან რჩებიან და სხვებს აზღვევენ, შესაბამისად, მისი გუნდი შეტევაში დაახლოებით 5 კაცით გადადის, რაც საკმაოდ დიდ უპირატესობას ქმნის.
ამორიმისთვის ასევე მნიშვნელოვანია, რომ გუნდმა ბურთი რაც შეიძლება დიდხანს შეინარჩუნოს, რათა მატჩზე კონტროლი ჰქონდეს. სპორტინგი სანამ საბოლოო შეტევას მოამზადებს, მინიმუმ 10-15 პასს მაინც აკეთებს და შემდეგ მზადდება საბოლოო დარტყმა, რომელსაც ხშირად ვიქტორ გიოკერესი ანხორციელებს ხოლმე.
სპორტინგის სათამაშო სტილს გამოარჩევს ცენტრალური მცველების პასის კულტურა და შეტევის დაწყების უნარი. ამორიმის გუნდში მცველებს ძალიან დიდი როლი აქვთ, რადგან უმეტესწილად, სწორედ ისინი იწყებენ ახალ შეტევებს. სამივე ცენტრალური მცველი ბურთს კარგად უნდა ფლობდეს და კარგი პირველი პასი უნდა ჰქონდეს, ეს ყველაფერი კი ცენტრში უფრო მეტ უპირატესობას ქმნის. საყრდენ ნახევარმცველებს ცენტრალური მცველები დიდ დახმარებას უწევენ.
რისკები და ცუდი გამოცდილება, სახელად ერიკ ტენ ჰაგი:
მანჩესტერ იუნაიტედში რუბენ ამორიმის მიახლოებულ ისტორიას უკვე კარგად იცნობენ... დაახლოებით იმავე წარსულით, გუნდში ერიკ ტენ ჰაგიც მოვიდა. ნიდერლანდელი ცნობილი ტაქტიკოსი იყო, ჰქონდა თამაშის საკუთარი სტილი, მაგრამ მან დიდწილად ვერ შეძლო ოლდ ტრაფორდზე იდენტობის ჩამოყალიბება და იბრძოდა არა ტიტულებისთვის, არამედ გუნდში ადგილის შესანარჩუნებლად.
ერთი შეხედვით, ამორიმის მოყვანაში ოპტიმიზმის უამრავი მიზეზი არსებობს, მაგრამ მაშინაც შეგეძლო იმავეს თქმა, როდესაც ერიკ ტენ ჰაგი მოდიოდა გუნდში. საქმე იმაშია, რომ იუნაიტედის წარუმატებლობას ბევრად უფრო დიდი ფესვები აქვს... წლებია საჭირო გუნდის იმ დონემდე მისასვლელად, სადაც ყოველთვის იყო. ამორიმი დათანხმდა ამ რთულ და სარისკო სამუშაოს და მზადაა გაიაროს დანაღმულ ველზე, ეს კი მის გამბედაობაზე მეტყველებს.
მანჩესტერ იუნაიტედში სულ სხვა სამუშაოს გაწევა გიწევს ადამიანს და სპორტინგში მიღწეული წარმატება, შეიძლება, საერთოდ არ იყოს საკმარისი. პრემიერ ლიგა სხვა განზომილებაა, აქ ერთ შეცდომასაც კი არავინ გაპატიებს და თუ წარმატების მიღწევა გინდა, საკუთარ თავს უნდა გადაახტე და რაღაც ახალი მოფიქირო.
ამორიმს ახალგაზრდებთან მუშაობის ძალიან კარგი გამოცდილება აქვს, ეს კი INEOS-ის ერთ-ერთი მთავარი მოთხოვნაა. პორტუგალიელმა კარგად იცის, როგორ გააუმჯობესოს 16-17-18 წლის ბიჭები და რაც ყველაზე მთავარია, იცის ტიტულების მოგება როგორ უნდა. პორტუგალიაში ქარიზმატულ პიროვნებად იცნობენ, აქვს საქმის კეთების საკუთარი გზა და იდეები, ითვლება ძლიერ პიროვნებად და სპეციალისტად... წინ კი მას მანჩესტერი ელოდება, ოლდ ტრაფორდი და პრემიერ ლიგის გიგანტები. მანჩესტერ იუნაიტედში რუბენ ამორიმის ერა იწყება.
