ანდრეა პირლოს იტალიის ეროვნული ნაკრების მთავარი მწვრთნელის პოსტზე დანიშვნა, რომელიც ფაქტობრივად შეთანხმებული იყო, საბოლოოდ ჩაიშალა. იტალიური წყაროების ინფორმაციით, ფეხბურთის ფედერაციამ გადაწყვეტილების შეცვლა მწვავე საზოგადოებრივი და პოლიტიკური კრიტიკის შემდეგ გადაწყვიტა. მთავარი მიზეზი პირლოს კავშირებია რუსულ ბუკმეიკერულ კომპანია Fonbet-თან, სადაც ის გლობალური ელჩის სტატუსით თანამშრომლობს, ასევე მისი ურთიერთობა რუს ბიზნესმენ სერგეი ლომაკინთან, რამაც იტალიაში ფართო დისკუსია და უარყოფითი რეაქცია გამოიწვია.
იტალიური მედიის ცნობით, ტექნიკური დირექტორი პაოლო მალდინი თავიდანვე მხოლოდ პირლოს კანდიდატურას უჭერდა მხარს და მიიჩნევდა, რომ სწორედ 47 წლის სპეციალისტი იყო საუკეთესო არჩევანი ეროვნული ნაკრების გრძელვადიანი პროექტისთვის. თუმცა, ფედერაციის პრეზიდენტი ჯოვანი მალაგო პირლოს დანიშვნის იდეას არ იზიარებდა და შექმნილი პოლიტიკური ფონის გათვალისწინებით უკვე ალტერნატიულ კანდიდატებზე მუშაობს. ამასთან, მალდინი არც რობერტო მანჩინისა და არც ანტონიო კონტეს დაბრუნებას ემხრობა. მანამდე იტალიის ნაკრების გაწვრთნაზე უარი თქვეს პეპ გვარდიოლამ და კარლო ანჩელოტიმაც, რის გამოც ფედერაცია კვლავ მთავარი მწვრთნელის ძიებაშია.
ვრცელდება მოსაზრებაც, რომ პირლოს პოლიტიკური მიზეზებით დაბლოკვა შესაძლოა მხოლოდ ფორმალური საბაბი იყოს, რათა მალდინის არჩევანი გვერდზე გადადონ. ბოლო საათებში განვითარებული მოვლენები შესაძლოა თავად მალდინის მომავალზეც აისახოს. იტალიური მედიის ინფორმაციით, მან ტექნიკური დირექტორის პოსტი სწორედ იმ პირობით მიიღო, რომ ახალი მთავარი მწვრთნელის არჩევაში სრული თავისუფლება ექნებოდა, ამიტომ არსებული ვითარება მისი შესაძლო გადადგომის შესახებ სპეკულაციებსაც აძლიერებს.
