ლივერპულში ახალი სეზონისთვის მზადებას იწყებენ. უკვე ცნობილია რომელი ფეხბურთელები აღარ შედიან კლუბის გეგმებში და ვინ შეიძლება დატოვოს ენფილდი ზაფხულში. რაც შეეხება ახალ ფეხბურთელებს, არნე სლოტისა და ვირჯილ ვან დაიკის განცხადებებს თუ დავუჯერებთ, კლუბს საკმაოდ დატვირთული ზაფხული ექნება.
"წინ საკმაოდ დატვირთლი ზაფხულის სატრანსფერო ფანჯარა გველოდება. ვფიქრობ, კლუბს ბევრი საქმე ექნება. უფროსობას ნდობა უნდა გამოვუცხადოთ, რათა სამუშაოები სწორად ჩაატარონ. ვიმედოვნებ, გუნდი ისე გაძლიერდება, რომ მომდევნო სეზონებში ყველა შესაძლო ტიტულის მოგებას მოვახერხებთ."
როგორც კლუბთან დაახლოებული წყაროები ამბობენ, ლივერპული ზაფხულში მინიმუმ 4-5 ფეხბურთელის დამატებას გეგმავს. პირველ რიგში უფროსობა დაცვის გაძლიერებას აპირებს — განიხილება როგორც ცენტრალური, ისე განაპირა მცველის დამატება. დინ ჰაუსენისა და მილოშ კერკეზის მიმართ ინტერესი უკვე დადასტურდა, თუმცა განიხილება სხვა ვარიანტებიც.
მოსალოდნელია, რომ გუნდი ერთ ნახევარმცველსაც დაიმატებს, თუმცა ამ მომენტისთვის უცნობია მთავარი სამიზნე. და ბოლოს, შეტევა, სადაც გუნდი დიდ აქტიურობას გეგმავს. ზაფხულში დიდი შანსია ლივერპული ლუის დიასმა, დარვინ ნუნიესმა და დიოგუ ჟოტამ დატოვონ, რაც იმას ნიშნავს, რომ უფროსობა მინიმუმ ორ შემტევს დაიმატებს. განიხილება ალექსანდერ ისაკისა და უგო ეკიტიკეს ვარიანტები.
ზაფხულის სატრანსფერო ფანჯრის მოახლოებასთან ერთად, ლივერპულის გარშემო უფრო მეტი ინფორმაცია გახდება ცნობილი. მერსისაიდის წითელ მხარეში დიდი გადატვირთვისთვის ემზადებიან.
