ბარსელონასა და მილანის ინტერის მატჩის (3:3) დასრულების შემდეგ, კომენტარი გააკეთა მასპინძელთა მთავარმა მწვრთნელმა, ჰანსი ფლიკმა. გერმანელმა დამრიგებელმა აღნიშნა, რომ საპასუხო შეხვედრისთვის კატალონიელები მხოლოდ მოსაგებად გავლენ. "ფინალი ფინალამდე", - ასე უწოდა "ბლაუგრანას" თავკაცმა "ნერაძურისთან" განმეორებით თამაშს.
"საუკეთესო სტარტი ნამდვილად არ ყოფილა. ჩვენ გავუშვით ორი გოლი, თუმცა საბედნიეროდ, ანგარიშის გათანაბრება მოვახერხეთ. მეორე ნახევარში გვქონდა რამდენიმე მომენტი, მაგრამ შეცდომებიც იყო. ქომაგებმა უბრალოდ დაუვიწყარი სანახაობა იხილეს. რაც შეეხება საპასუხო შეხვედრას, მხოლოდ მოგება გვჭირდება.
ეს იქნება ფინალი ფინალამდე. ჩვენი მოწინააღმდეგე არის ძალიან გამოცდილი გუნდი, რომელიც ეფექტურად იყენებს სტანდარტების შესრულების დროს არსებულ უპირატესობას. ეს ჩემპიონთა ლიგის 1/2 ფინალია და აქ სუსტი მეტოქეები არ არსებობენ. ინტერმა ეს დაამტკიცა."
