ეროვნული ლიგის 26-ე ტურში გათამაშების ლიდერმა რუსთავმა მეშახტეს 0:1 სტუმრად მოუგო და მნიშვნელოვანი სამი ქულა მოიპოვა.
შეხვედრაში ერთადერთი გოლი ლუკა პარკაძემ გაიტანა, რითის რუსთავი კვლავ სატურნირო ცხრილის ლიდერი გახდა.
ქუთაისის ტორპედომ სამგურალს უმასპინძლა. მატჩი საკმაოდ უხვგოლიანი გამოდგა და მასპინძელთა გამარჯვებით 3:2 დასრულდა.
მატჩის საუკეთესო ფეხბურთელი გიორგი არაბიძე იყო, ქუთაისელთა ლიდერმა ულამაზესი გოლი გაიტანა და 2 საგოლე გადაცემა გააკეთა.
ამ მატჩში თავისი სადებიუტო გოლი ნოდარ ლომინაძემ გაიტანა, ერთი ბურთი კი ჩემპიონატის ბომბარდირმა ანდრიჩმა გაიტანა.
უხვგოლიანი გამოდგა დინამო თბილისისა და გაგრას მატჩიც, თუმცა ბევრი გოლი მხოლოდ ერთი გუნდის კარში გავიდა.
დინამო თბილისმა ულამაზესი, კომბინაციური ფეხბურთი შემოგვთავაზა და მეტოქე 4:0 გაანადგურა.
ანგარიში ნიკა ნინუამ გახსნა, რასაც ხარაიშვილის ულამაზესი საჯარიმო მოჰყვა, მალევე ხარაიშვილმა დუბლი გაიფორმა. მეორე ნახევარში კი გაგრა 10 კაცით დარჩა და თავისი გოლი კურდიჩმაც გაიტანა.
