მიუხედავად იმისა, რომ ნაპოლი კვლავ ინარჩუნებს სერია ა-ს მოგების შანსებს და აქტიურ ბრძოლაშია ჩართული, ჯერჯერობით არ იციან, რა მოხდება ზაფხულში.
საქმე ის არის, რომ გუნდის მთავარ მწვრთნელს ანტონიო კონტეს ნაპოლის დატოვება სურს. ამის ერთ-ერთი მიზეზი ზამთრის სატრანსფერო ფანჯარაა, როცა მთავარი ლიდერის - ხვიჩა კვარაცხელის წასვლის შემდეგ, გუნდმა შემცვლელი ვერ მოიყვანა.
თავის მხრივ, ნაპოლის პრეზიდენტი აურელიო დე ლაურენტისი კონტეს გაშვებას არ აპირებს და სურს, რომ თავის კლუბში რაც შეიძლება დიდხანს დარჩეს.
დე ლაურენტისი კონტეს ჰპირდება, რომ სიტყვას შეუსრულებს და ზაფხულის სატრანსფერო ფანჯარაზე 2-3 ისეთ ფეხბურთელს იყიდის, რომელიც თავად მწვრთნელს სურს, მათ შორის ხვიჩას შემცვლელსაც.
ასეთია ამ ეტაპზე სიტუაცია ნეაპოლურ კლუბში, დანარჩენი კი სეზონის ბოლოს გაირკვევა. ახლა გუნდი მთლიანად სერია ა-ს მატჩებზეა კონცეტრირებული.
