ოფიციალურად: ზინედი ზიდანი საფრანგეთის ეროვნული ნაკრების მთავარი მწვრთნელია! საფრანგეთის ფეხბურთის ფედერაციამ ამის შესახებ განცხადება სულ რამდენიმე წუთის წინ გააკეთა. მხარეებს შორის 4-წლიანი კონტრაქტი გაფორმდა.
54 წლის სპეციალისტმა პრესკონფერენციაზე საინტერესო თემებზე ისაუბრა.
"დღევანდელი დღე ჩემთვის ოცნების ასრულებაა. ბოლო ოთხი-ხუთი წლის განმავლობაში არაერთი შეთავაზება მივიღე კლუბებისგან, თუმცა ყველა მათგანზე უარი ვთქვი, რადგან მხოლოდ საფრანგეთის ნაკრების გაწვრთნა მინდოდა. ეს ერთადერთი საქმეა, რომლის გაკეთებაც მსურდა.
ამ ნაკრებს ბავშვობიდან ვიცნობ, ყველა საფეხური გავიარე და საბოლოოდ ეროვნულ ნაკრებამდე მივედი. ყველაფერს გავაკეთებ იმისთვის, რომ ეს გუნდი გამარჯვებების გზაზე დარჩეს, რადგან სწორედ ეს არის ის, რაც ყველაზე მეტად მამოძრავებს.
დიდიე დეშამს მინდა მადლობა გადავუხადო იმ სამუშაოსთვის, რომელიც ბოლო წლებში გასწია. ახლა ახალი ეტაპი იწყება, თუმცა მიზანი უცვლელი რჩება, გამარჯვება. ამ გუნდისთვის მთელ ჩემს ენერგიას დავხარჯავ. მოუთმენლად ველოდები გუნდთან ერთად მუშაობის დაწყებას.
ჩემს სათამაშო სტილს ძალიან მალე იხილავთ. სექტემბერში პრესკონფერენცია გვექნება და მაშინ უფრო დეტალურად ვისაუბრებ. ჩემი მთავარი ფილოსოფია თამაშია. კარიერის განმავლობაში "თიანის“ პოზიციაზე ვთამაშობდი და ყველაზე მეტად გოლების გატანა მამოძრავებს. 25 წელი ესპანეთში გავატარე და თქვენ კარგად იცით, რას ნიშნავს ეს. მოედანზე ლიდერი ვიყავი, ახლა კი ლიდერი ჩემი გამოცდილებით ვიქნები.
მომავალი კაპიტანი? კილიანთან ჯერ არ მისაუბრია. მისთვის ახლა ყველაზე მნიშვნელოვანი დასვენებაა. სექტემბერში შესაძლებლობა გვექნება, მასთან და ყველა ფეხბურთელთან ერთად ყველაფერზე მშვიდად ვისაუბროთ.
ეროვნული ნაკრების მთავარი მწვრთნელობა კლუბში მუშაობისგან განსხვავდება, მაგრამ ეს ყველაფერი საერთოდ არ მაშინებს. წლები სწორედ ამის გაკეთება მინდოდა. შევძლებ, ბალანსი შევინარჩუნო პირად ცხოვრებასა და საფრანგეთის ეროვნულ ნაკრებში მუშაობას შორის.
რას ვსაქმიანობდი რეალ მადრიდიდან წასვლის შემდეგ? ძალიან ბევრ მატჩს ვუყურე, იმაზე მეტსაც კი, ვიდრე მაშინ, როცა რეალ მადრიდის მწვრთნელი ვიყავი. საფრანგეთის ნაკრებს მთლიანობაში ძალიან ბევრს ვაკვირდებოდი და ბევრი რამ დავინახე. ახლა კი მზად ვარ ამ ნაკრებთან ერთად წარმატებას მივაღწიო."
