მწვანე კონტინენტზე საქართველოს დელეგაცია 36 სპორტსმენით (27 კაცი და 9 ქალი) გაემგზავრა და გახსნის ცერემონიაზე მედროშე ძალოსნობის მოქმედი ევროპის ჩემპიონი, გიორგი ასანიძე იყო, რომელიც ოლიმპიადის ფავორიტებში მოიაზრებოდა.
ძალოსნობის 85 კგ. წონით კატეგორიაში გიორგი ასანიძეს ოქროს მოპოვების მართლაც კარგი შანსი ჰქონდა და უმაღლესი ჯილდო მხოლოდ სხეულის წონის გამო დათმო. ატაცის შემდეგ მედლისთვის ბრძოლაში სამი მთავარი ფავორიტი გამოიკვეთა — გიორგი ასანიძე საქართველოდან, მარკ ჰუშტერი გერმანიიდან და 2-გზის ოლიმპიური ჩემპიონი, პიროს დიმასი საბერძნეთიდან. საბოლოოდ, ორჭიდის ჯამში სამივე სპორტსმენმა ერთნაირი, 390 კგ. შედეგი დააფიქსირა და გამარჯვებული პირადი წონით გამოვლინდა. მათგან ყველაზე მსუბუქი პიროს დიმასი აღმოჩნდა და კარიერაში მესამედ მოიპოვა ოლიმპიური ოქრო, ხოლო გიორგი ასანიძე ბრინჯაოს დასჯერდა.
სიდნეის ოლიმპიადაზე საქართველოს დელეგაციამ პირველი მედალი კრივში მოიპოვა, სადაც მძიმე წონაში წარმატებით იასპარეზა ვლადიმერ ჭანტურიამ და ბრინჯაოს მედალს დაეუფლა. ძიუდოს 66 კგ. წონით კატეგორიაში კი მესამე ადგილის მფლობელი გიორგი ვაზაგაშვილი გახდა.
ორი მედლით დაასრულა საქართველოს ბერძნულ-რომაული სტილით მოჭიდავეთა ნაკრებმა ასპარეზობა 2000 წლის ოლიმპიური თამაშებზე — ბრინჯაოს მედლები აკაკი ჩაჩუამ (-63 კგ.) და მუხრან ვახტანგაძემ (-85 კგ.) წონით კატეგორიებში მოიპოვეს.
თავისუფალი სტილით მოჭიდავე, ელდარ კურტანიძემ სიდნეიში წარმატებით დაიწყო ასპარეზობა და 1/2 ფინალშიც გავიდა, სადაც რუს საგიდ მურთაზალიევთან დამარცხდა და ოქროს მედლის გარეშე დარჩა. მესამე ადგილისთვის შეხვედრაში, ქართველმა ფალავანმა პოლონელი მარეკ გარმულევიცი დაამარცხა და ატლანტის მსგავსად, სიდნეიშიც ბრინჯაოს მედალს დასჯერდა.
ატლანტის ოლიმპიადის შემდეგ, საქართველოს ნაკრებმა სიდნეიში 4-ით მეტი მედალი აიღო, თუმცა, კვლავ ოქროს და ვერცხლის მედლების გარეშე დაასრულა ასპარეზობდა — საბოლოოდ, საქართველოს დელეგაცია 199 ქვეყნიდან 69-ე ადგილზე გავიდა.
