სპორტული თვალსაზრისის გარდა, ოლიმპიადა სიმბოლოებითაც არის დატვირთული — ერთ-ერთი მთავარი სიმბოლო კი მასკოტია, რომელსაც მასპინძელი ქვეყანა გულმოდგინედ არჩევს და ცდილობს, მასში თავისი კულტურა და ისტორია გამოხატოს. გთავაზობთ, რამდენიმე გამორჩეულ მასკოტს.
სემი (ლოს ანჯელესი, 1984)
1984 წლის ოლიმპიადა გამორჩეული იყო როგორც სპორტული, ასევე პოლიტიკური თვალსაზრისით. ეს ის დროა, როცა ცივი ომი დასკვნით ფაზაში იყო შესული და დაპირისპირებული ბანაკები ყველა სფეროში ცდილობენ პირველობის მოპოვებას. საერთაშორისო ოლიმპიური კომიტეტის გადაწყვეტილებით, 1980 წლის ოლიმპიადა საბჭოთა კავშირში, ხოლო 1984 წლის აშშ-ში ჩატარდა. აშშ-მა და დასავლურმა სამყარომ, სსრკ-ს 1979 წელს ავღანეთში შეჭრის გამო ბოიკოტი გამოუცხადეს და მოსკოვის ოლიმპიადაზე მონაწილეობა არ მიიღეს. საპირისპიროდ, საბჭოთა მხარემაც უარი განაცხადა ლოს ანჯელესში ჩასვლაზე.
ლოს ანჯელესის ოლიმპიადის ორგანიზატორებმა მასკოტის შექმნის დროს მიზნად დაისახეს, რომ მას აშშ-ის სიმბოლოები უნდა გამოეხატა და ასეც მოხდა — შექმნეს არწივი ამერიკის დროშის ფერებში, რომელსაც სემი დაარქვეს. არწივი ქვეყნის პატრიოტიზმის გამოხატულება იყო, ხოლო ძია სემი — სახელმწიფოს პოლიტიკური კურსის სიმბოლო. მასკოტი დისნეის მხატვარმა, ბობ მურიმ შექმნა.
ჰოდორი (სეული, 1988)
სამხრეთ კორეამ ზაფხულის ოლიმპიურ თამაშებს 1988 წელს უმასპინძლა, ეს ოლიმპიადა ბოლო აღმოჩნდა საბჭოთა კავშირისთვის — 3 წლის შემდეგ, სსრკ ოფიციალურად დაიშალა და 15-მა ქვეყანამ დამოუკიდებლობა მოიპოვა.
სეულის ოლიმპიადის მთავარი სიმბოლო, ჰოდორი ვეფხვია, რომელიც აზიურ ლეგენდებში ხშირად გვხვდება. სახელის შერჩევისას კი ორგანიზატორებმა კონკურსი გამოაცხადეს და 2,295 ვარიანტიდან ჰოდორი შეარჩიეს. "ჰო" კორეულ ენაში სიტყვა ვეფხვის (ჰორანგი) შემოკლებული ვერსიაა, ხოლო დორი ბიჭის კნინობითი ფორმა — ასე შეიქმნა სეულის მასკოტი.
ათენა და პივოსი (ათენი, 2004)
2004 წლის ათენის ოლიმპიური თამაშების ორგანიზატორებმა მასკოტი ანტიკურ სამარხში აღმოჩენილი თოჯინას პროტოტიპზე შექმნეს, რომელიც ძველი წელთაღრიცხვის VII საუკუნით არის დათარიღებული.
აღნიშნული თოჯინის პროტოტიპზე შეიქმნა ათენას და პივოსის მასკოტი, რომელიც ორგანიზატორების თქმით, გამოხატავს კავშირს ანტიკურ საბერძნეთსა და თანამედროვე ოლიმპიურ თამაშებს შორის.
ფუვა (პეკინი, 2008)
პეკინის ოლიმპიური თამაშების ორგანიზატორებმა მასკოტი სახელად ფუვა 2005 წლის 11 ნოემბერს წარადგინეს და ის ქართულად ითარგმნა, როგორც იღბლის მომტანი თოჯინები. დიზაინი ცნობილმა ჩინელმა მხატვარმა, ჰან მეილინმა შექმნა.
დიზაინის მიხედვით 5 ფუვა 5 ოლიმპიურ რგოლს და შესაბამისად, 5 კონტინენტს გამოხატავს. ბეიბეი - ლურჯი რგოლი და ევროპა, ცინცინი - შავი რგოლი და აფრიკა, ჰუანჰუანი - წითელი რგოლი და ჩრდილოეთ და სამხრეთ ამერიკა, ინინი - ყვითლი რგოლი და აზია, ნინი მწვანი რგოლი და ავსტრალია და ოკეანეთი.
ვინისიუსი (რიო დე ჟანერიო, 2016)
რიო დე ჟანერიოს ოლიმპიადის ორგანიზატორებმა ოფიციალურ მასკოტში გამოხატეს ბრაზილიის ველური ბუნების მრავალფეროვნება და სახელი ბრაზილიელი ლირიკოსის, ვინისიუს დე მორაესის პატივსაცემად შეურჩიეს.
მასკოტის საბოლოო ვერსია კი 2016 წლის რიო დე ჟანეიროს ოლიმპიადის ორგანიზატორებმა 2014 წლის 24 ნოემბერს გამოაქვეყნეს.
მირაიტოვა (ტოკიო, 2020)
2020 წლის ოლიმპიური თამაშები იაპონიის დედაქალაქ ტოკიოში ჩატარდა. მასკოტი ტოკიოს ოლიმპიური თამაშების საორგანიზაციო კომიტეტმა 2,042 ვერსიიდან შეარჩია და 2018 წლის 28 ნოემბერს ოფიციალურად დაამტკიცა.
მირაიტოვა რობოტი ბიჭია, რომელიც იაპონიის თანამედროვეობას გამოხატავს. სახელი კი ორი იაპონური სიტყვის შეერთებით არის მიღებული — "მირაი" (მომავალი) და "ტოვა" (მარადისობა).
ფრიგიული ჩაჩი (პარიზი, 2024)
2024 წლის პარიზის ოლიმპიადის მასკოტი ფრიგიული ჩაჩი (რბილი კონუსური ფორმის ქუდი) იქნება, რომელიც ანტიკურ ხანაში გამოიყენებოდა.
საფრანგეთში ფრიგიული ქუდი გახდა ჯერ იაკობინელების, ხოლო შემდეგ მთლიანად რევოლუციისა და თავისუფლების სიმბოლო. ორი წითელი მასკოტი ფრიგიული ქუდით პარიზის ოლიმპიადაზე გამოხატავს თავისუფლებასა და რევოლუციას.
ზაფხულის რიგით XXXIII ოლიმპიური თამაშები, რომელსაც საფრანგეთის დედაქალაქი პარიზი უმასპინძლებს, ოფიციალურად 26 ივლისს გაიხსნება და 11 აგვისტოს დასრულდება.
