საქართველოს ეროვნულ ოლიმპიურ კომიტეტში სეოკ-ის ოფისში ჩატარდა სპორტსმენთა ფორუმი და საინფორმაციო სემინარი, რომელსაც დაესწრნენ სეოკ-ის სპორტსმენთა კომისიის წევრები და საქართველოს ეროვნული ნაკრები გუნდების წევრი სპორტსმენები სპორტის სხვადასხვა სახეობიდან.
სეოკ-ის პრეზიდენტმა ლერი ხაბელოვმა ისაუბრა სპორტისა და ოლიმპიური მოძრაობის როლზე თანამედროვე საზოგადოებაში, ხაზი გაუსვა საგანმანათლებლო სემინარის მნიშვნელობას და წარმატებები უსურვა სპორტსმენებს. ფორუმზე განხილეს სპორტისა და ოლიმპიური მოძრაობის აქტუალური საკითხები.ფორუმის მონაწილეებს მიმართა სეოკ-ის სპორტსმენთა კომისიის თავმჯდომარე გოგიტა არქანია.
სპორტსმენთა ფორუმსა და საინფორმაციო სემინარის მუშაობაში მონაწილეობა მიიღეს სეოკ-ის პირველმა ვიცე-პრეზიდენტმა ელგუჯა ბერიშვილმა, ვიცე-პრეზიდენტებმა ნინო სალუქვაძემ და მამუკა ხაბარელმა, გენერალურმა მდივანმა ემზარ ზენაიშვილმა, საერთაშორისო ურთიერთობის სამსახურის უფროსმა რუსუდან აფციაურმა, ჟურნალისტმა და პუბლიცისტმა, პროფესორმა პაატა ნაცვლიშვილმა, ანტიდოპინგური სააგენტოს გენერალურმა მდივანმა თეიმურაზ უკლებამ, ცნობილმა სპორტულმა ჟურნალისტმა თამარ ბალავაძემ, მათ წარმოადგინეს პრეზენტაციები ოლიმპიური მოძრაობის აქტუალურ საკითხებზე და უპასუხეს შეკითხვებს.
შეხვედრა საქართველოს ეროვნული ოლიმპიური კომიტეტის და სეოკ-ის სპორტსმენთა კომისიის ინიციატივითა და საერთაშორისო ოლიმპიური კომიტეტის ოლიმპიური სოლიდარობის მხარდაჭერით ჩატარდა.
სპორტსმენთა ფორუმისა და საინფორმაციო სემინარის მონაწილეებს სეოკ-ის სერტიფიკატები გადასცა ოლიმპიური კომიტეტის პრეზიდენტმა ლერი ხაბელოვმა.
