დღეს თბილისის ოლიმპიურ სასახლეში, საქართველოს ფუტსალის ეროვნულმა ნაკრებმა ევროპის ჩემპიონატის საკვალიფიკაციო ეტაპის პლეიოფის პირველი მატჩი ჩაატარა. ჩვენი გუნდი სლოვაკეთის ნაკრებს დაუპირისპირდა და 4-1 გაიმარჯვა. ქართველთაგან არჩილ სებისკვერაძემ დუბლი გაიფორმა, თითო გოლი კი შოთა თოფურიას და გიორგი ჩიმაკაძის ანგარიშზეა.
მატჩის შესახებ, საქართველოს ფუტსალის ნაკრების ფეხბურთელებმა, შოთა თოფურიამ და გიორგი ჩიმაკაძემ ისაუბრეს:
შოთა თოფურია: “ანგარიშის მიუხედავად, ძალიან რთული თამაში გამოვიდა. მეტოქე შესწავლილი გვყავდა. ვიცოდით, ფიზიკურად ძლიერი გუნდი იყო, კომბინაციურად გავლილი გვქონდა. მაქსიმალურად ვეცადეთ, ჩვენი პლიუსები გამოგვეყენებინა. პირველი ტაიმი რა თქმა უნდა, რთული იყო, თან დაძაბულები ვიყავით, მეორე გოლმა გარდატეხა შეიტანა, უფრო გავიხსენით და სასურველი ანგარიში დავაფიქსირეთ. დიდი მადლობა მინდა ვუთხრა გულშემატკივარს, მათი მხარდაჭერა მნიშვნელოვანია და ამ გამარჯვებაში დიდი წვლილი შეიტანეს, ორმაგი ემოცია და ძალა გვაქვს როცა ისინი გვქომაგობენ.“
გიორგი ჩიმაკაძე: “დაძაბული მატჩი იყო და ამას ველოდით, სლოვაკეთის ნაკრები ძალიან კარგი გუნდია, სასიხარულოა, რომ გავიმარჯვეთ, მადლობა ბიჭებს, მწვრთნელს და ყველას, რომ გავაკეთეთ ყველაფერი და ამ გამარჯვებამ ერთი ნაბიჯით წინ წაგვწია შემდეგი თამაშისთვის და ეს ერთი ნაბიჯი იქნება, რომ უფრო მივუახლოვდებით ევროპის ჩემპიონატს, ჯერ ყველაფერი წინ არის, განმეორებით მატჩში ყველაფერი უნდა გავაკეთოთ სასურველი შედეგისთვის.”
საქართველომ დღევანდელი გამარჯვებით ვროპის ჩენპიონატის საგზურის მოსაპოვებლად მნიშვნელოვანი ნაბიჯი გადადგა, ევრო 2026-ზე თამაშის უფლებას 2 მატჩის ჯამში გამარჯვებული გუნდი მოიპოვებს.
პლეიოფის საპასუხო შეხვედრა,სლოვაკეთი - საქართველო, 23 სექტემბერს, ბრატისლავაში გაიმართება.
ევროპის ჩემპიონატი 2026 წლის 20 იანვრიდან 7 თებერვლის ჩათვლით ჩატარდება. ტურნირს ლატვია, ლიეტუვა და სლოვენია უმასპინძლებენ.
