დღეს თბილისის ოლიმპიურ სასახლეში, საქართველოს ფუტსალის ეროვნულმა ნაკრებმა ევროპის ჩემპიონატის საკვალიფიკაციო ეტაპის პლეი-ოფის პირველი მატჩი ჩაატარა. ჩვენი გუნდი სლოვაკეთის ნაკრებს დაუპირიპირდა და 4-1 გაიმარჯვა.
მატჩის შესახებ საქართველოს ფუტსალის ნაკრების მთავარმა მწვრთნელმა, ავთანდილ ასათიანმა ისაუბრა:
“რთული თამაში რომ იქნებოდა ვიცოდით. გუნდს ეტყობოდა მიცემული დავალებების შესრულებას ცდილობდა, მადლობას ვუხდი ბიჭებს. დიდა მადლობა გულშემატკივრებს, ქომაგებს, ასეთი ქომაგობა თუ გვექნება არ ვიცი, რომელი ნაკრები შეძლებს ჩვენ დამარცხებას სახლის მატჩებზე.
დღევანდელი მატჩის შემდეგ ჩათვალეთ, ჯერ პირველი ტაიმი დასრულდა. ძალიან რთული თამაში გველოდება ბრატისლავაში. ანგარიშის მიუხედავად, ბევრად მეტი ბრძოლა გველოდება, როგორც ვიცი სლოვაკეთში 8 000 ბილეთია გაყიდული, იქ უკვე გვაქვს შესაძლებლობა მეორე ნომრად ვითამაშოთ. ვფიქრობ, დღევანდელი გამარჯვება დავიმსახურეთ, დანარჩენი სლოვაკეთში გამოჩნდება.”
საქართველომ დღევანდელი გამარჯვებით, ვროპის ჩენპიონატის საგზურის მოსაპოვებლად მნიშვნელოვანი ნაბიჯი გადადგა, ევრო 2026-ზე თამაშის უფლებას 2 მატჩის ჯამში გამარჯვებული გუნდი მოიპოვებს.
პლეიოფის საპასუხო შეხვედრა,სლოვაკეთი - საქართველო, 23 სექტემბერს, ბრატისლავაში გაიმართება.
ევროპის ჩემპიონატი 2026 წლის 20 იანვრიდან 7 თებერვლის ჩათვლით ჩატარდება. ტურნირს ლატვია, ლიეტუვა და სლოვენია უმასპინძლებენ.
ფოტო: საქართველოს ფეხბურთის ფედერაცია
