სამგზის ოლიმპიური ჩემპიონი ძალოსნობაში ლაშა ტალახაძე ფიცარნაგზე დაბრუნდა. ლაშა ამ დროისთვის, საქართველოს ნაკრებთან ერთად, მსოფლიოს ჩემპიონატისთვის ემზადება.
ტალახაძის მთავარი მიზანი 2028 წლის ლოს-ანჯელესის ოლიმპიადისთვის ლიცენზიის მოპოვებაა.
საქართველოს ძალოსანთა ეროვნული და ახალგაზრდული ნაკრებები ბაკურიანში ევროპის ახალგაზრდული და უფროსებს შორის მსოფლიოს ჩემპიონატებისთვის ემზადებიან. საქართველოს სპორტის მინისტრი შალვა გოგოლაძე ქართველ ძალოსნებს შეხვდა და ჩემპიონატებზე წარმატებული ასპარეზობა უსურვა. მინისტრმა ასევე აღნიშნა, რომ სამინისტრო მომავალშიც გააგრძელებს სპორტის ამ სახეობის მხარდაჭერას.
შეხვედრას ესწრებოდნენ საქართველოს ძალოსნობის ეროვნული ფედერაციის პრეზიდენტი ლაშა ტალახაძე, ძალოსნობის ეროვნული ნაკრების მთავარი მწვრთნელი გიორგი ასანიძე და ფედერაციის სხვა წარმომადგენლები.
შეგახსენებთ, ლაშა ტალახაძეს 2024 წლის ოლიმპიური თამაშების შემდეგ ტურნირებში მონაწილეობა აღარ მიუღია, პარლამენტის წევრი გახდა, შემდეგ კი საქართველოს ძალოსნობის ფედერაციის პრეზიდენტის პოსტიც დაიკავა.
ევროპის ახალგაზრდული ჩემპიონატი 12 ოქტომბრიდან 19 ოქტომბრის ჩათვლით ალბანეთში გაიმართება.
უფროსებს შორის მსოფლიოს ჩემპიონატს კი ჩინეთი 27 ოქტომბრიდან 8 ნოემბრის ჩათვლით უმასპინძლებს.
