ფეხბურთში ხშირად გვხვდება ტრანსფერები, რომლებიც გვაძლევს კონტრასტს, თუ როგორ იცვლებოდა მოთამაშის ღირებულება და გუნდების ინტერესთა არეალი წლიდან წლამდე. მსგავსი ისტორია უკავშირდება რაფა ლეაუს, რომელიც სულ რაღაც რამდენიმე წლის წინ იყო ტოპ კლუბებისთვის ერთ-ერთი სასურველი მოთამაშე, მაგრამ ბოლოს ის აღმოჩნდა სტამბოლში, გალათასარაიში.
სერია ა-ს 2021/2022 წლების სეზონი - მილანის ჩემპიონობა და პორტუგალიელი შემტევის უმაღლესი კლასის პერფომანსი, რითაც ის წლის საუკეთესო მოთამაშეც გახდა კალჩოში. Transfermarkt-ი "როსონერის" ექს-ვინგერს აფასებდა 85 მილიონად, მაგრამ კლუბისთვის ის ბევრად უფრო ძვირი ღირდა.
"დიავოლოს" ყოფილი ათიანის სახელს უკავშირებდნენ რეალ მადრიდს, ბარსელონას, ჩელსისა და მანჩესტერ სიტის, თუმცა ეს გუნდები დააფრთხო 1-მა ფაქტორმა: 150-მილიონიანმა ჩეკმა. დიახ, სან სიროს მკვიდრები 27 წლის ვინგერს სწორედ აღნიშნული თანხის სანაცვლოდ შეელეოდნენ. თამაშიდან გავიდა ყველა, მილანი კი საკუთარი მოთხოვნის მსხვერპლი აღმოჩნდა.
იშვიათ გამონათებებს თუ არ ჩავთვლით, ლეაუს თამაშის ხარისხი ეცემოდა თვიდან - თვემდე. მასთან მიმართებაში პირველ რიგში თვალში გვხვდებოდა უკვე არა ნიჭი ან სისწრაფე, თუ დრიბლინგი, არამედ არასტაბილურობა და სიზარმაცე. პორტუგალილი ვინგერის გამოცოცხლება ვერც მისმა თანამემამულე სპეციალისტებმა შეძლეს.
საუბარია პაულუ ფონსეკასა და სერჟიუ კონსეისაუს შესახებ...რაფაელის ათამაშება ვერც გამოცდილმა მასიმილიანო ალეგრიმ მოახერხა. საბოლოო წერტილი დასვა კიდევ ერთმა პორტუგალიელმა სპეციალისტმა, რუბენ ამორიმმა, რომელმაც პრესეზონზევე მიანიშნა "როსონერის" ექს-ვინგერს წასვლაზე.
ამ ყველაფრის პარალელურად, "დიავოლოს" მოთხოვნილი 150 მილიონი დაეცა 45 მილიონამდე, "სამეფო კლუბი", "ბლაუგრანა" და "ქალაქელები" კი ასტონ ვილასა და რამს პარკიდან ინტერესით ჩანაცვლდა. დიახ, სან სიროს მკვიდრთა ყოფილ მე-10 ნომერს ჰქონდა ინგლისში გადასვლის ვარიანტი, მაგრამ აღნიშნულიც კი არ გამოვიდა.
27 წლის შემტევი გადავიდა ოქან ბურუქის გუნდში, სადაც აღმოჩნდა ლეროი სანეს, ვიქტორ ოსიმენის, ლუკას ტორეირასა და სხვა პრობლემური თუ ჩამოწერილი ვარსკვლავების გვერდით. დროებითი ნავსაყუდელი ქამბექის პერსპექტივით ტოპ კლუბში თუ ადგილი, რომელშიც ლეაუ აღმოჩნდება კომფორტში...ამას დრო გვიჩვენებს.
